Беларускім гандбалістам дазволілі ўдзельнічаць у міжнародных турнірах
15 ліпеня, Позірк. Міжнародная федэрацыя гандбола (IHF) 15 ліпеня паведаміла пра зняцце забароны на ўдзел беларускіх і расійскіх каманд у турнірах пад сваёй эгідай.
Таксама абмежаванні знятыя з афіцыйных асоб, суддзяў, гандбольных лектараў і экспертаў.
Адзначаецца, што рашэнне прынята Саветам IHF пасля рэкамендацый Міжнароднага алімпійскага камітэта (МАК), зацверджаных 7 траўня (у дачыненні да Беларусі) і 7 ліпеня (у дачыненні да Расіі).
Забарона, якая дзейнічала з сакавіка 2022 года, адменена з неадкладным уступленнем у сілу.
Як адзначае IHF, у дачыненні да спартсменаў будуць прымяняцца толькі патрабаванні, прадугледжаныя антыдопінгавымі правіламі.
У рэлізе падкрэсліваецца, што падрыхтоўка да вяртання беларускіх і расійскіх каманд вялася паэтапна. У сакавіку Савет IHF дазволіў моладзевым зборным абедзвюх краін праводзіць і ўдзельнічаць у самастойна арганізаваных таварыскіх матчах і турнірах пры ўмове падпісання дэкларацый аб адсутнасці сувязяў з ваеннымі і дзяржаўнымі сілавымі структурамі. У траўні федэрацыя таксама дапусціла магчымасць давання беларускай або расійскай камандзе спецыяльнага запрашэння (wild card) на чэмпіянат свету сярод дзяўчат да 16 гадоў і Кубак нацый.
У IHF заявілі, што поўная рэінтэграцыя беларускіх і расійскіх каманд і афіцыйных асоб можа заняць час, аднак выказалі надзею на іх “хуткае вяртанне ў міжнародную гандбольную супольнасць”.
Пры гэтым федэрацыя падкрэсліла, што працягвае падтрымліваць Федэрацыю гандбола Украіны, выказвае салідарнасць з Украінай і асуджае працяглую вайну. Заяўляецца, што IHF разлічвае на “як мага хутчэйшае аднаўленне міру” і “нармальнага міжнароднага спартыўнага супрацоўніцтва”.
Напярэдадні стала вядома, што 9 еўрапейскіх краін накіравалі еўрапейскаму камісару па пытаннях спорту Глену Мікалефу прапанову выключыць з праграм абмену Erasmus+ і іншых мер падтрымкі Еўрапейскага саюза МАК і іншыя спартыўныя арганізацыі, якія дапускаюць вяртанне Расіі і Беларусі на міжнародныя спартыўныя спаборніцтвы.
28 лютага 2022 года, неўзабаве пасля пачатку поўнамаштабнай агрэсіі РФ супраць Украіны, Міжнародны алімпійскі камітэт (МАК) заклікаў міжнародныя спартыўныя федэрацыі не дапускаць да спаборніцтваў атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расійскі і беларускі спорт апынуўся амаль у поўнай ізаляцыі.
28 сакавіка 2023 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у якасці індывідуальных нейтральных спартсменаў, без адпаведнай дзяржаўнай сімволікі.
7 ліпеня 2026 года МАК зняў усе абмежаванні з Расіі і аднавіў у правах краінавы алімпійскі камітэт. За два месяцы да гэтага, 7 траўня, выканкам МАК заявіў, што “больш не рэкамендуе якія-небудзь абмежаванні на ўдзел беларускіх спартсменаў, уключаючы каманды, у спаборніцтвах, якія праводзяцца міжнароднымі федэрацыямі і арганізатарамі міжнародных спартыўных мерапрыемстваў”.
Пасля гэтага пра допуск беларускіх спартсменаў на свае спаборніцтвы на роўных умовах з прадстаўнікамі іншых краін заявілі аб’яднанні па каратэ, гімнастыцы, фехтаванні, веласпорце, спартыўных танцах, більярдзе, водных лыжах, боксе, тайскім боксе, сучасным пяцібор’і і валейболе, парусным спорце, барацьбе, цяжкай атлетыцы, а таксама Міжнародная федэрацыя студэнцкага спорту, пад эгідай якой у 2027 годзе адбудуцца летняя і зімовая ўніверсіяды.
Пры гэтым захаваныя абмежаванні ў дачыненні да лёгкаатлетаў, тэнісістаў, біятланістаў і прадстаўнікоў шэрагу іншых відаў спорту.
Нацыянальны алімпійскі камітэт (НАК) Украіны сумесна з Міністэрствам моладзі і спорту краіны і нацыянальнымі спартыўнымі федэрацыямі на працягу траўня і чэрвеня 2026 года накіравалі ў міжнародныя федэрацыі 30 афіцыйных лістоў з просьбай не дапускаць да спаборніцтваў спартсменаў з Беларусі і Расіі пад дзяржаўнымі сцягамі, гімнамі і іншай нацыянальнай сімволікай.
