Вальфовіч запатрабаваў ад ДПК “нарошчвання вайсковага кампанента” на мяжы з Украінай

12 лютага, Позірк. У 2025 годзе неабходна “асноўную ўвагу надаць нарошчванню інжынернай інфраструктуры і вайсковага кампанента, перш за ўсё на ўкраінскім кірунку“, заявіў дзяржсакратар Савета бяспекі Аляксандр Вальфовіч на пасяджэнні калегіі Дзяржпагранкамітэта (ДПК) 12 лютага.

Вальфовіч, як паведамляе прэс-служба ДПК, выказаўся таксама за ўзмацненне існуючых і стварэнне новых памежных падраздзяленняў, аснашчэнне іх “беспілотнымі лятальнымі апаратамі рознага прызначэння і сродкамі барацьбы з імі“.

Дзяржсакратар Савета бяспекі чарговым разам абвінаваціў суседнія Літву, Латвію і Польшчу ў мілітарызацыі і “штучна ствараемых перашкодах у міжнародных зносінах у пунктах пропуску“, Кіеў — у “бясконцым нарошчванні памежных загарод“.

Паводле слоў старшыні ДПК Канстанціна Маластова, эфектыўнасць аховы мяжы павінна павысіць актыўнае прымяненне пілатуемай і беспілотнай авіяцыі. У 2025 годзе “працягнецца актыўнае будаўніцтва новых комплексаў памежных застаў на беларуска-ўкраінскай мяжы“.

Прыярытэтнымі задачамі ведамства ён назваў “забеспячэнне гатоўнасці да спынення ўзброеных і іншых правакацый на дзяржаўнай мяжы, працяг нарошчвання сістэмы сіл і сродкаў органаў памежнай службы, іх аснашчэнне сучасным узбраеннем і тэхнікай, удасканаленне баявой падрыхтоўкі”.

Мінск падтрымлівае Маскву ў развязанай ёю поўнамаштабнай вайне супраць Украіны. На пачатку канфлікту ў лютым 2022 года беларуская тэрыторыя выкарыстоўвалася РФ як плацдарм для нападу.