Былы муж лёгкаатлеткі Ціманоўскай Зданевіч заявіў пра гатоўнасць супрацоўнічаць са следствам

14 лютага, Позірк. Пра гатоўнасць супрацоўнічаць са следствам заявіў Арсень Зданевіч — некалі спартсмен, былы муж экс-беларускай лёгкаатлеткі Крысціны Ціманоўскай, якая атрымала грамадзянства Польшчы, 14 лютага ў эфіры праграмы прапагандыста Рыгора Азаронка “Інфармацыйны Баявы Атрад”.

Паводле слоў Азаронка, у Зданевіча “наперадзе сустрэча са следчымі”.

Зданевіч падкрэсліў, што не ведае падрабязнасцей прав грамадскую дзейнасць сваёй былой жонкі, не дасведчаны ў падрабязнасцях працы Беларускага фонду спартыўнай салідарнасці і людзях, якія яго ўзначальваюць.

Пры гэтым ён некалькі разоў абвінаваціў Ціманоўскую ў хлусні і паклёпе на яго. Падкрэсліў, што “галасаваў на выбарах” за Аляксандра Лукашэнку.

Са слоў Зданевіча вынікае, што ён у свой час атрымаў польскае грамадзянства як муж Ціманоўскай, але хоча жыць у Беларусі, куды прыехаў свядома: “Дзе б я ні быў, <…> заўжды хацелася вярнуцца назад. Колькі б я там ні знаходзіўся, заўсёды, калі я перасякаў мяжу з Беларуссю, я, можна сказаць, з палёгкай выдыхаў. Я сюды ехаў мэтанакіравана, бо мне тут падабаецца, мне тут камфортна, у мяне тут родныя. Тут камфортна жыць, і я планую тут пражыць усё жыццё”.

Мужчына сцвярджае, што яго выкарыстоўвалі: “У асноўным усё гэта закруцілася праз тое, што мая былая жонка — аматар вось гэтых усіх момантаў, недзе быць першай, пакрычаць і зрабіць выгляд, што я тут і я супраць усіх, і ўсе глядзіце. А я, атрымліваецца, быў проста як лялька, якой <…> кіруюць: ты павінен тут са мной быць, ты павінен там са мной быць. Я, груба кажучы, як цацка, мяне то туды, то сюды”.

Зданевіч заклікаў былую жонку вярнуцца ў Беларусь: “Калі ў вас маюцца нейкія пытанні ці прэтэнзіі да мяне ці яшчэ да некага з Беларусі, то вы можаце прыехаць сюды і асабіста іх задаць. Таму не займайцеся глупствам у інтэрнэце, лепш уключайце галаву і прыязджайце”.

13 лютага стала вядома, што Следчы камітэт правярае інфармацыю пра датычнасць Зданевіча да “здзяйснення злачынстваў”.

“Паводле звестак следства, сёлета ў лютым у сетцы Інтэрнэт, у тым ліку ў сацыяльных сетках, з’явілася інфармацыя пра тое, што ў Беларусі знаходзіцца Арсеній Зданевіч, які, зыходзячы з тэкстаў публікацый, браў удзел у экстрэмісцкіх акцыях, скіраваных на дыскрэдытацыю Рэспублікі Беларусь і дзейнай улады, выкарыстоўваў адпаведную сімволіку і здзяйсняў іншыя дзеянні, скіраваныя на распальванне сацыяльнай варожасці і варажнечы”, — паведаміла ведамства.

“Карыстальнікі сеткі спасылаюцца на крыніцу ў асобе былой жонкі А.Зданевіча — удзельніцы аднаго з экстрэмісцкіх фарміраванняў К.Ціманоўскай, якая цяпер знаходзіцца па-за межамі Беларусі”, — гаварылася ў паведамленні.

СК заявіў, што на падставе “распаўсюджванай у сетцы інфармацыі” распачатыя “праверачныя мерапрыемствы”. “Разглядаецца пытанне пра магчымае прыцягненне Зданевіча да вызначанай законам адказнасці. Кожнаму факту супрацьпраўнай дзейнасці будзе дадзеная прынцыповая прававая ацэнка”, — заявіла ведамства.

Ціманоўская, якая ўваходзіла ў беларускую зборную, атрымала шырокую вядомасць пасля скандалу на Алімпійскіх гульнях 2021 года ў Токіа. Трэнерскі склад запатрабаваў ад яе выступіць у дысцыпліне, якая разыходзілася з яе профілем. Ціманоўская адмовілася і вынесла праблему на публіку. Шырокай грамадскасці стала вядома пра канфлікт спартсменкі з намеснікам дырэктара рэспубліканскага цэнтра алімпійскай падрыхтоўкі па лёгкай атлетыцы Артурам Шумаком і галоўным трэнерам па лёгкай атлетыцы Юрыем Майсевічам.

1 жніўня 2021 года Ціманоўскую спрабавалі прымусова адправіць на радзіму, аднак у аэрапорце Токіа яна звярнулася па дапамогу ў паліцыю. З Японіі яна вылецела ў Аўстрыю, а затым у Польшчу, дзе пражывае зараз.

28 чэрвеня 2023 года прэзідэнт Польшчы Анджэй Дуда падпісаў акт аб прыняцці яе ў грамадзянства.

Ціманоўская ў складзе зборнай Польшчы ўдзельнічала ў Алімпійскіх гульнях, якія прайшлі ў Парыжы 26 ліпеня — 11 жніўня 2024 года.

Ціманоўская развялася са Зданевічам у 2023 годзе, абвінаваціўшы яго ў здрадах і фінансавых махінацыях.

9 лютага 2025 года медыя “Наша Ніва” паведаміла, што лёгкаатлетка пабачыла Зданевіча на відэазапісе ў сацсетках мінскай аўтамыйкі. Ціманоўская была “ў шоку ад таго, што былы муж у прынцыпе адважыўся перасекчы мяжу радзімы”, разам з тым адзначыўшы, што, паводле яе інфармацыі, у Беларусь ён вярнуўся праз Расію.

“Па-першае, ён атрымаў у Польшчы польскае грамадзянства праз подпіс прэзідэнта за 9 месяцаў, таму што з’яўляецца палітычным уцекачом, і пры падачы на грамадзянства пазначыў у анкеце, што яму небяспечна вяртацца ў Беларусь, — адзначыла спартсменка. — Па-другое, ён даў шмат інтэрв’ю супраць улады, а таксама ў яго было шмат сторыс пра 2020-ы, выбары, мітынгі і вайну ва Украіне. Па-трэцяе, разам са мной ён хадзіў на мітынгі ў Польшчы і насіў БЧБ-сцяг”.

Пасля гэтага, паведаміла “Наша Ніва”, яна “тэгнула ў сваіх сторыс акаўнт МУС Беларусі, а таксама пагранічнай службы”.

Такім чынам, Ціманоўская фактычна прыцягнула ўвагу беларускіх сілавікоў да сітуацыі са Зданевічам.