На ЧАЭС чацвёртыя суткі працягваецца ліквідацыя наступстваў атакі расійскага дрона

17 лютага, Позірк. Ліквідацыя наступстваў пажару працягваецца на Чарнобыльскай атамнай электрастанцыі, паведамляе Дзяржаўнае агенцтва Украіны па ўпраўленні зонай адчужэння.

Паведамляецца аб трох ачагах тлення на 13.00 па мясцовым часе, для тушэння і частковага ўскрыцця канструкцый хованкі прыцягнутыя тры групы верхалазаў па чатыры чалавекі ў кожнай, “выканана 22 адтуліны, агульная плошча раскрыцця — каля 2 кв.м”.

Да ліквідацыі наступстваў прыцягнутыя ратавальнікі Дзяржаўнай службы па надзвычайных сітуацыях (ДСНС), радыяцыйная абстаноўка на тэрыторыі ЧАЭС застаецца стабільнай, “выхаду радыеактыўных прадуктаў за ўстаноўленыя межы не зафіксавана”, гаворыцца ў паведамленні.

14 лютага паведамлялася, што беспілотны лятальны апарат урэзаўся ў ахоўную абалонку аркі новага бяспечнага канфайнмента (саркафага) ЧАЭС, уведзенага ў строй у 2019 годзе.

У той жа дзень у зону адчужэння для “асвятлення працэсу ліквідацыі наступстваў прамога траплення расійскага БПЛА ў ахоўную абалонку новага бяспечнага канфайнмента“ быў арганізаваны прэс-тур для карэспандэнтаў мясцовых і замежных СМІ, а таксама міжнароднай экалагічнай арганізацыі “Грынпіс“.

Дэмакратычны лідар Беларусі Святлана Ціханоўская, якая вырасла на заражанай радыенуклідамі тэрыторыі, заявіла, што “ўзрушаная атакай расійскага беспілотніка” на Чарнобыльскую АЭС.

24 лютага 2022 года, у першы дзень поўнамаштабнага ўварвання ва Украіну, расійскія войскі, якія зайшлі з беларускай тэрыторыі, захапілі ЧАЭС і прабылі там да 31 сакавіка, пасля чаго адступілі ў РФ разам з палоннымі байцамі Нацыянальнай гвардыі, якія ахоўвалі станцыю. У выніку дзеянняў расійскай арміі быў сур’ёзна парушаны працоўны працэс, у тым ліку электразабеспячэнне.