“Мінскводаканал” папярэдзіў пра магчымае пагаршэнне якасці вады на паўночным усходзе сталіцы

25 лютага, Позірк. Праз адключэнне электраэнергіі 25 лютага ў 8:54 спынілася помпавае абсталяванне водазабору № 5 “Бараўляны”, паведамляе прадпрыемства “Мінскводаканал”.

“Адбылося зніжэнне ціску на вадаправоднай сетцы ў квартале вуліц Мірашнічэнкі — Сядых — Лагойскі тракт — Гамарніка — Каліноўскага — Цікоцкага — Карбышава. Магчымае пагаршэнне якасці вады ў акрэсленай зоне ўплыву”, — гаворыцца ў паведамленні.

Прадпрыемства выслала брыгады для “рэгламентных работ, скіраваных на ліквідацыю магчымых наступстваў, выкліканых адключэннем на кабельных сетках”.

У 9:50 прэс-служба Мінгарвыканкама паведаміла, што “Мінскія кабельныя сеткі” аднавілі энергазабеспячэнне, праводзіцца “плаўны запуск помпаў і аднаўленне ціску ў водаправоднай сетцы”.

Сёлета 10 студзеня Мінск пачаў цалкам забяспечвацца вадой з артэзіянскіх крыніц.

Паводле даных прадпрыемства “Мінсктранс”, шэраг тралейбусаў і трамваеў не курсіраваў з 8:47 да 9:30 праз адсутнасць напругі на вуліцах Філімонава, Кедышкі, Кнорына, Кузьмы Чорнага, Мірашнічэнкі, Каліноўскага, а таксама бульвары Талбухіна і Лагойскім тракце.