4 верасня, Позірк. Аб затрыманні 48-гадовага грамадзяніна Беларусі пры перагрузцы буйной партыі нелегальных цыгарэт паведаміла Служба аховы дзяржаўнай мяжы (САДМ) пры МУС Літвы.
Інцыдэнт адбыўся ўдзень 28 жніўня ў паўночнай частцы Клайпеды. Супрацоўнікі аддзела крымінальнай выведкі памежнай каманды берагавой аховы САДМ звярнулі ўвагу, што з зарэгістраванага ў Польшчы грузавіка MAN з паўпрычэпам у грузавік Scania з дацкімі нумарамі “з дапамогай ручнога пагрузчыка перагружалі паддоны са скрынкамі“.
Усяго выяўлена 448 каробак з 224 тыс. пачкаў цыгарэт без акцызных марак. Сярод іх было 144 тыс. пачкаў Winston Slender, 48 тыс. Marlboro, 16 тыс. Marlboro Gold і 16 тыс. Prince Red. Кошт грузу, разам з усімі падаткамі, што падлягаюць выплаце ў Літве, ацэнены амаль у 1,4 мільёна еўра.
У час аперацыі затрымана двое мужчын: 44-гадовы літовец, жыхар Каўнаскага раёна і 48-гадовы грамадзянін Беларусі.
Па дадзеных САДМ, беларус знаходзіўся ў краіне легальна. У яго быў дазвол на пражыванне ў Польшчы, дзе, паводле яго слоў, ён працуе кіроўцам у адной з лагістычных кампаній.
Па факце незаконнага распараджэння падакцызнымі таварамі САДМ пачала дасудовае расследаванне. Яго каардынуе пракурор аддзела крымінальнага пераследу Клайпедскай акруговай пракуратуры.
За такое злачынства прадугледжаны штраф або пазбаўленне волі на тэрмін да васьмі гадоў, удакладняе служба.
Абодва затрыманыя былі змешчаныя ў ізалятар. 31 жніўня суд абраў ім меры стрымання ў выглядзе арышту.
Паводле звестак САДМ, падробленыя цыгарэты вядомых сусветных і беларускіх брэндаў вырабляюцца на падпольных прадпрыемствах у Латвіі. Праваахоўнікі гэтай краіны “ўжо ліквідавалі некалькі такіх вытворчасцей“.
Затрыманая ў Клайпедзе партыя цыгарэт таксама магла прыбыць адтуль, лічыць літоўская служба.
Аўтарызавацца
Забыліся пароль?
Выхад з профілю
