Лукашэнка накіраваўся ў Маскву

13 сакавіка, Позірк. Аляксандр Лукашэнка накіраваўся ў Маскву, паведаміў раніцай 13 сакавіка неафіцыйны тэлеграм-канал яго прэс-службы.

Раней гэтая крыніца адзначала, што палітык “зробіць афіцыйны візіт у Расійскую Федэрацыю, перамовы з прэзідэнтам Расіі Уладзімірам Пуціным пройдуць 13 сакавіка ў Крамлі”.

Плануецца, што Лукашэнка і Пуцін у фармаце “адзін на адзін”, а затым у пашыраным складзе — з удзелам членаў дэлегацый — абмяркуюць “развіццё супрацы”, “перспектыўныя напрамкі ўзаемадзеяння”, “сумесную працу ў інтэграцыйных фарматах” і пытанні “цяперашняй міжнароднай сітуацыі”.

Чакаецца, што “па выніках перамоў будзе падпісаны пакет дакументаў”. “У праграме візіту таксама — шэраг іншых мерапрыемстваў, прадугледжаных яго афіцыйным статусам”, — заяўляў рэсурс.

11 сакавіка прэс-сакратар Пуціна Дзмітрый Пяскоў заявіў, што перамовы расійскага лідара з Лукашэнкам на гэтым тыдні будуць “вельмі субстантыўнымі”.