МУС Літвы раскрытыкавала прапанаванае кансерватарамі ўзмацненне жорсткасці абмежаванняў у дачыненні да беларусаў
23 сакавіка, Позірк. Міністэрства ўнутраных спраў Літвы “выказала занепакоенасць” у сувязі з ініцыятывай дэпутатаў-кансерватараў зрабіць больш жорсткімі абмежаванні ў дачыненні да грамадзян Беларусі і Расіі, якія пражываюць у краіне, паведамляе партал навін Delfi.
“Ведамства папярэджвае, што прапанаваныя меры створаць значную нагрузку на Службу аховы дзяржаўнай мяжы і Дэпартамент міграцыі [пры МУС], а ў некаторых выпадках могуць аказацца цяжка рэалізуемымі”, — адзначаецца ў публікацыі.
Асцярогі звязаныя з прапановай пазбаўляць беларусаў і расіян віду на жыхарства, калі яны выязджалі на радзіму больш за адзін раз за тры месяцы.
На думку МУС, кантроль за такім перамяшчэннем замежнікаў “будзе складана арганізаваць”.
“Служба аховы дзяржаўнай мяжы не зможа адсачыць, калі чалавек заязджае ў Літву праз іншую краіну ЕС, напрыклад, Польшчу. А Дэпартамент міграцыі не зможа праверыць, колькі разоў ён перасёк мяжу Еўрасаюзу”, — прыводзіць выданне словы намесніка міністра ўнутраных спраў Аліцыі Шчарбайтэ.
“Яшчэ адна прапанова — адмена падачы новых заяў на ВНЖ для беларусаў. У цяперашні момант Літва ўжо прыпыніла прыём такіх заяў ад грамадзян Расіі (за выключэннем уладальнікаў шэнгенскіх віз і тых, у каго ўжо ёсць літоўскі ВНЖ). Цяпер кансерватары хочуць распаўсюдзіць гэтую меру і на беларусаў”, — паведамляе медыя.
Са спасылкай на экспертаў падкрэсліваецца, што “такі крок фактычна пазбавіць іх магчымасці атрымаць новы від на жыхарства, а гэта супярэчыць еўрапейскаму заканадаўству”.
“У прыватнасці, ЕС патрабуе захоўваць права на ўз’яднанне сем’яў, а таксама не абмяжоўваць пераезд высокакваліфікаваных спецыялістаў. На гэты момант Сейм Літвы ўжо падоўжыў нацыянальныя санкцыі супраць грамадзян Расіі і Беларусі да 2026 года, аднак новыя абмежаванні пакуль застаюцца на стадыі абмеркавання”, — адзначаецца ў матэрыяле.
14 сакавіка паведамлялася, што старшыня кансерватыўнай партыі “Саюз Айчыны — Хрысціянскія дэмакраты Літвы” Лаўрынас Кашчунас прапануе зрабіць больш жорсткімі абмежаванні для беларусаў, прапісаныя ў прадстаўленым літоўскім МЗС законапраекце аб падаўжэнні нацыянальных санкцый.
Парламентарый разам з калегамі па апазіцыі мае намер зарэгістраваць адпаведны варыянт у Сейме.
“Я гатовы дапамагчы міністру замежных спраў, які фактычна прынёс леташнюю версію [закону аб санкцыях у дачыненні да грамадзян Беларусі і Расіі], нічога не абнавіў, — заявіў Кашчунас у эфіры Žinių radijas. — Мы сёння зарэгіструем папраўкі, прапануем крыху ўзмацніць праект, увесці такія ж абмежаванні”.
На думку дэпутата, калі грамадзянін Беларусі з дазволам на жыхарства ў Літве вяртаецца на радзіму хаця б раз на тры месяцы “з неаб’ектыўных прычын, без тлумачэння прычын, то бок робіць гэта рэгулярна”, то выдадзены яму ДНЖ варта ануляваць.
13 сакавіка стала вядома, што МЗС Літвы прапануе Сейму падоўжыць на год нацыянальныя санкцыі ў дачыненні да грамадзян Беларусі і РФ — да 2 траўня 2026-га.
У адпаведнасці з законам аб санкцыях, які парламент Літвы ўпершыню прыняў у 2023 годзе, прыпынены прыём заяў на атрыманне шэнгенскіх і нацыянальных віз ад грамадзян Беларусі і РФ за выключэннем выпадкаў, калі літоўскае МЗС выступае пасярэднікам у прыёме дазволаў на часовае пражыванне. Выключэнне робіцца толькі для тых, хто мае дзейную шэнгенскую або нацыянальную візу, дазвол на жыхарства ў Літве ці іншай краіне ЕС.
Беларусаў і расіян, якія прыбываюць з-за межаў ЕС, дадаткова правяраюць на наяўнасць пагроз нацыянальнай бяспецы, грамадскаму, дзяржаўнаму парадку, унутранай бяспецы.
Таксама яны не могуць увозіць або вывозіць украінскія грыўны; забаронены ўвоз у Літву сельскагаспадарчай прадукцыі і кармоў расійскага ці беларускага паходжання.