На жыхара Капыльскага раёна заведзеная крымінальная справа за пашкоджанне агароджы мемарыяла ахвярам фашызму

24 сакавіка, Позірк. У дачыненні да жыхара аграгарадка Новыя Дактаровічы Капыльскага раёна (Минская вобласць) распачатая крымінальная справа паводле ч. 1 арт. 339 КК (хуліганства), паведамляе прэс-служба Следчага камітэта.

Паводле матэрыялаў следства, увечары 8 сакавіка 38-гадовы мужчына, “знаходзячыся ў стане алкагольнага ап’янення, праявіў цынічную непавагу да святога месца”. Удакладняецца, што ён нанёс “два ўдары нагой па бетоннай панэлі мемарыяла “Магіла ахвяр фашызму”. У выніку была пашкоджаная агароджа.

“На допыце мужчына раскаяўся ў зробленым і прынёс свае прабачэнні за свой амаральны ўчынак, патлумачыўшы следчым свае паводзіны празмерным ужываннем алкаголю напярэдадні. Ён паабяцаў у бліжэйшы час самастойна ліквідаваць пашкоджанні і цалкам пакрыць нанесеную шкоду”, — паведаміла афіцыйны прадстаўнік УСК па Мінскай вобласці Марыя Нікіціна.

Паводле яе слоў, “вінаваты панясе заслужанае пакаранне за свой блюзнерскі ўчынак”.

Максімальнае пакаранне паводле ч. 1 арт. 339 КК — тры гады пазбаўлення волі.

Праца па захаванні “гістарычнай памяці” аб Вялікай Айчыннай вайне “праводзілася заўсёды і будзе праводзіцца кожны дзень, кожную гадзіну, кожную хвіліну”, — завіў 20 сакавіка намеснік начальніка ўпраўлення Генеральнай пракуратуры па наглядзе за расследаваннем асабліва важных крымінальных спраў Сяргей Шыкунец.

“Толькі тады мы сфарміруем у грамадства ўстойлівую сувязь з мінулым, ажывім, абудзім, удасканалім ген патрыятызму, які ёсць у кожнага нашага грамадзяніна, пачынаючы з маленства і да састарэлага ўзросту”, — сказаў ён.

“Гена патрыятызму” не існуе, гэты эўфемізм выкарыстоўваюць у Расіі прыхільнікі савецкай, сталінісцкай трактоўкі падзей Другой сусветнай вайны і агрэсіі РФ супраць Украіны. Апаненты называюць гэта “победобесием”. Пра неабходнасць “абудзіць” гэты “ген” Шыкунец у публічнай прасторы гаворыць як мінімум год.