Пяць банкаў абвясцілі аб новаўвядзеннях у працы з кліентамі
24 сакавіка, Позірк. Пяць банкаў, якія працуюць у Беларусі, паведамілі аб змене асобных правілаў абслугоўвання і прадставілі новыя магчымасці для кліентаў, сведчыць праведзены “Позіркам“ маніторынг іх актуальных прэс-рэлізаў.
“БНБ-Банк” адмяніў для фізічных асоб максімальны памер камісіі за банкаўскі перавод у кітайскіх юанях. Цяпер яна складае 0,45% ад сумы транзакцыі (мінімум 50 долараў). Акрамя гэтага, зніжана да 100 рублёў камісія за змяненне або адмену плацежнай інструкцыі, расследаванне дэталяў выканання плацежных інструкцый па пісьмовым запыце кліента па банкаўскіх пераводах у Кітай.
“Неа Банк Азія” з 25 сакавіка змяніў камісію за міжнародныя пераводы фізічных асоб. У доларах яна складзе 50 долараў + 1,3% (максімум 330 долараў), у казахстанскіх тэнге — 0,5% ад сумы пераводу (мінімум 25, максімум 150 долараў).
“Парытэтбанк” з 25 сакавіка ўносіць змены па прадукту “Аўтакрэдыт”. У прыватнасці, дадаюцца новыя тэрміны для афармлення крэдыту — 24, 60, 84, 120 месяцаў. Павялічваецца тэрмін прадастаўлення пасведчання аб рэгістрацыі аўтамабіля з моманту падпісання акта прыёму-перадачы да 30 дзён. Для катэгорыі грамадзян, якія знаходзяцца ў прызыўным узросце і маюць адтэрміноўку ад праходжання службы па прызыву, дададзена дадатковае забеспячэнне — даручальніцтва фізічнай асобы.
“Сбербанк (Беларусь)” знізіў памер дадатковага ўзнагароджання па пераводах у індыйскіх рупіях з 3% да 0,5% (мінімум 15 долараў).
“Тэхнабанк” пачаў аказваць паслугу трансгранічных пераводаў у рамках сістэмы імгненных плацяжоў. Цяпер кліенты могуць пераводзіць сродкі фізічным асобам у Расію па нумары мабільнага тэлефона і найменні банка. Максімальная сума аднаго пераводу — 150 рублёў; максімальная колькасць пераводаў у дзень — да пяці на суму не больш за 500 рублёў.
На 1 лютага 2025 года ў краіне быў зарэгістраваны 21 банк.
Прыбытак банкаў за студзень склаў 227 млн рублёў — на 13,2% больш, чым за студзень 2024-га (200,6 млн), сведчыць праведзены “Позіркам“ аналіз звестак Нацыянальнага банка.
Нарматыўны капітал павялічыўся за аглядны перыяд на 14% (з 20 млрд 101,9 млн рублёў на 1 лютага 2024-га да 22 млрд 897,1 млн рублёў на 1 лютага 2025-га), актывы, схільныя да крэдытнай рызыкі, — на 14,9% (з 98 млрд 356 млн да 112 млрд 985 млн).
Неабслугоўваных актываў стала менш на 37,9% (3 млрд 215,5 млн супраць 5 млрд 177,6 млн).
Велічыня пакрыцця ліквіднасці паменшылася на 3,8 працэнтнага пункта (са 145,7% да 141,9%), чыстага стабільнага фандавання стала больш на 0,3 п.п. (рост з 130,9% да 131,2%).