У лютым пасля прыкметнага зніжэння намінальная сярэдняя зарплата вырасла на 70 капеек (дапоўнена)

25 сакавіка, Позірк. Намінальная налічаная сярэдняя заработная плата работнікаў Беларусі ў лютым 2025 года склала 2.428,1 рубля — на 70 капеек больш (+0,03%), чым у студзені (2.427,4), сведчыць праведзены “Позіркам” аналіз звестак Нацыянальнага статыстычнага камітэта.

У студзені ў параўнанні са снежнем 2024-га заробак знізіўся на 266,5 рубля (-9,89%) — за апошні месяц 2024-га ён склаў 2.693,9 рубля.

Па ўзроўні намінальнай зарплаты традыцыйна лідзіруе Мінск — 3.309,1 рубля (у студзені — 3.332; -0,69%). У Мінскай вобласці яна склала 2.442,7 (2.444; -0,05%), Гомельскай — 2.169,7 (2.175,1; -0,25%), Гродзенскай — 2.118,7 (2.105,8; +0,61%), Брэсцкай — 2.103 (2.088,1; +0,71%), Магілёўскай — 2.014,7 (2.001,9; +0,64%), Віцебскай — 2.011 (1.996,7; +0,72%).

Больш за ўсё было налічана работнікам сектара інфармацыі і сувязі — 5.845,2 рубля (5.982,4; -2,29%).

Далей ідуць прадстаўнікі:

сферы фінансаў і страхавання — 3.905,3 (4.221,6; -7,49%);

будаўніцтва — 2.812,3 (2.712,7; 3,67%);

прафесійнай, навуковай і тэхнічнай дзейнасці — 2.964,6 (2.928,8; +1,22%);

лагістыкі — 2.292 (2.384,3; -3,87%);

аптовага і рознічнага гандлю — 2.242,1 (2.283; -1,79%);

аперацый з нерухомай маёмасцю — 2.150,8 (2.090,7; 2,87%);

сельскай, лясной і рыбнай гаспадаркі — 1.892,7 (1.933; -2,08%);

аховы здароўя і сацыяльных паслуг — 1.974,1 (1.990,1; -0,8%);

творчасці, спорту, забаў і адпачынку — 1.867,6 (1.807,9; +3,3%);

іншых відаў паслуг — 1.891,3 (1.938,7; -2,44%);

сферы паслуг па часовым пражыванні і харчаванні — 1.713 (1.808,8; -5,3%);

дзейнасці ў галіне адміністрацыйных і дапаможных паслуг — 1.769,8 (1.747,8; +1,26%);

адукацыі — 1.783,9 (1.729,8; +3,13%).

Аб зніжэнні даходаў заявіла 24,7% рэспандэнтаў, якія прынялі ўдзел у штоквартальным апытанні даследчага цэнтра BEROC (праводзіўся з 31 студзеня па 16 лютага), паведаміла на брыфінгу 18 лютага навуковы супрацоўнік цэнтра Віялета Панасевіч.

Больш за палову апытаных (52%) назвала прычынай рост коштаў, кожны пяты — памяншэнне заказаў (кліентаў). На змяншэнне даходаў 19% рэспандэнтаў паўплывала змяненне курсу беларускага рубля да замежных валют. Аб скарачэнні заробкаў паведамілі 15%, адмянілі прэмію і павышэнне заробкаў — 13% і 12% адпаведна.

Паводле звестак Белстата, рэальныя грашовыя даходы насельніцтва (даходы з улікам інфляцыі) у 2024 годзе павялічыліся на 9,7% да ўзроўню 2023-га.

Як паведамлялася, у лютым спажывецкія цэны выраслі на 1,3%: харчовыя тавары падаражэлі на 0,7%, нехарчовыя — на 0,5%, паслугі — на 3,5%.

З пачатку гэтага года кошты выраслі на 2%: харчовыя тавары сталі даражэй на 1,6%, нехарчовыя — на 1%, паслугі — на 4%.

У гадавым вымярэнні (да лютага 2024 года) цэны павялічыліся на 5,6%. Харчаванне стала даражэйшае на 6,7%, нехарчовыя тавары — на 3,4%, паслугі — на 6,5%.

Згодна з важнейшымі прагнознымі (дэ-факта планавымі) параметрамі развіцця краіны на 2024 год, рэальныя грашовыя даходы насельніцтва павінны былі вырасці на 3,5%, рэальныя зарплаты — на 3,9%, намінальная сярэднямесячная зарплата павінна быць не меншай за 2.087 рублёў (у бюджэтным сектары — не меншай за 1.634).