За чатыры дні ў Беларусі патанула шэсць чалавек

30 сакавіка, Позірк. Шэсць чалавек патанула на тэрыторыі Беларусі з 26 па 29 сакавіка, сведчыць праведзены “Позіркам” аналіз даных Міністэрства па надзвычайных сітуацыях.

Цела пенсіянера (1956 года нараджэння) вынята 26 сакавіка са штучнага вадаёма на тэрыторыі прыватнага домаўладання ў вёсцы Першамайск Столінскага раёна (Брэсцкая вобласць).

У Паставах (Віцебская вобласць) таксама ў двары прыватнага дома 27 сакавіка ў яме, напоўненай вадой, патануў мужчына (1976 г.н.).

У гэты ж дзень пенсіянер (1939 г.н.) патануў ванне у кватэры дома па вул. Матусевіча ў Мінску.

Аналагічны выпадак зафіксаваны 28 сакавіка ў сталіцы па вуліцы Цімашэнкі — загінуў мужчына (1983 г.н.).

Два пенсіянеры (1948 г.н. і 1960 г.н.) патанулі 29 сакавіка ў рацэ Случ у Слуцку (Мінская вобласць) і рацэ Прыпяць у Пінску (Брэсцкая вобласць) адпаведна.

Раней паведамлялася, што за тыдзень (3–9 сакавіка) у вадаёмах Беларусі патанула 14 чалавек.

Паводле інфармацыі прэс-сакратара МНС Яўгена Бараноўскага, з 1 студзеня па 4 сакавіка ў Беларусі патанула 28 чалавек, у тым ліку адно дзіця. За той жа перыяд 2024 года — 23 (+21,74%).