ДПК паведаміў аб выяўленні на мяжы з Латвіяй мігранта са зламанай нагой

4 красавіка, Позірк. У Віцебскай вобласці на мяжы з Латвіяй 3 красавіка знойдзены грамадзянін Афганістана “ў змарнелым стане”, паведамляе Дзяржаўны пагранічны камітэт (ДПК).

Ён не мог самастойна перасоўвацца, паколькі “латвійскія сілавікі зламалі бежанцу нагу”, заяўляе ведамства.

Са спасылкай на словы мігранта адзначаецца, што пасля перасячэння мяжы яго “жорстка збілі”, “ужывалі электрашокер”, а затым “выкінулі на беларускую тэрыторыю”.

Замежнік дастаўлены ў медустанову, дзе ў яго дыягнаставаны пералом пятачнай косткі, гаворыцца ў паведамленні.

Дзяржаўная памежная ахова Латвіі адсправаздачылася аб прадухіленні спробаў 5 нелегалаў пранікнуць у краіну з Беларусі 2 красавіка. З пачатку года такіх спроб зафіксавана 360.

За 2024 год Літва, Латвія і Польшча прадухілілі 36,3 тыс. спроб незаконнага пранікнення мігрантаў з беларускай тэрыторыі.

Міграцыйны крызіс на мяжы Беларусі і краін Еўрасаюза працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты апынаюцца на мяжы з краінамі ЕС у зоне адказнасці памежнага ведамства.

Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, бо іх туды “паклікалі”.