Армяне заслугоўваюць свабоднай, дэмакратычнай будучыні ў Еўропе — Ціханоўская

5 красавіка, Позірк. Армяне заслугоўваюць “свабоднай, дэмакратычнай і мірнай будучыні ў Еўропе”, заявіла Святлана Ціханоўская, віншуючы народ гэтай краіны з “гістарычным крокам” на шляху да еўраінтэграцыі.

“З падпісаннем прэзідэнтам Арменіі Ваагнам Хачатуранам закона аб пачатку працэсу ўступлення Арменіі ў ЕС, ужо прынятага парламентам, пачынаецца новы раздзел”, — напісала палітык на сваёй старонцы ў сацыяльнай сетцы Х.

4 красавіка Хачатуран падпісаў закон “Аб пачатку працэсу ўступлення Рэспублікі Арменія ў Еўрапейскі саюз”. За дзень да гэтага кіраўнік МЗС Арарат Мірзаян накіраваў свайму расійскаму калегу Сяргею Лаўрову пасланне да 33-годдзя ўсталяванне дыпламатычных стасункаў паміж краінамі, у якім заявіў, што Ерэван арыентуецца на “доўгатэрміновую ўзаемавыгадную супрацу” з Масквой у “палітычнай, сацыяльна-эканамічнай, гуманітарнай і іншых сферах” і скіраваны на “працяг і пашырэнне змястоўнага дыялогу”.

12 лютага парламент Арменіі прыняў законапраект пра пачатак уступлення ў ЕС. Ініцыятарам законапраекта была грамадзянская ініцыятыва “Платформа дэмакратычных сіл”. За два месяцы яна сабрала 60 тыс. подпісаў прыхільнікаў адпаведнай ідэі, неабходных, каб вынесці дакумент на разгляд Народнага сходу.

9 студзеня законапраект ухваліў урад Арменіі.

Стасункі Арменіі з асобнымі членамі інтэграцыйных утварэнняў на постсавецкай прасторы пачалі астываць з канца 2020 года на фоне карабахскага канфлікту. Пасля другой вострай фазы ў верасні 2023 года ён завяршыўся скасаваннем самаабвешчанай Нагорна-Карабахскай Рэспублікі, якую ў тым ліку ў ваенным плане падтрымліваў Ерэван, і пераходам рэгіёну пад кантроль Азербайджана.

Арменія, незадаволеная адсутнасцю падтрымкі з боку АДКБ, афіцыйна замарозіла, а фактычна спыніла ўдзел у гэтым ваенна-палітычным блоку (31 сакавіка 2025 года МЗС пацвердзіла, што не мае намеру ўдзельнічаць у фінансаванні дзейнасці арганізацыі). Адначасова Ерэван стаў сігналізаваць пра гатоўнасць да збліжэння з Еўрасаюзам.