15 красавіка, Позірк. Албанія, Боснія і Герцагавіна, Ісландыя, Ліхтэнштэйн, Чарнагорыя, Нарвегія, Паўночная Македонія і Украіна далучыліся да рашэння Савета Еўрапейскага саюза ад 27 сакавіка 2025 года (CFSP) 2025/6321 аб абмежавальных мерах у сувязі з сітуацыяй у Беларусі і ўдзелам краіны ў расійскай агрэсіі супраць Украіны, паведаміў Савет ЕС 15 красавіка.
Адзначаецца, што пералічаныя краіны забяспечаць адпаведнасць сваёй нацыянальнай палітыкі дадзенаму рашэнню Савета, а Еўрасаюз прымае да ведама гэта абавязацельства і вітае яго.
27 сакавіка ЕС увёў санкцыі ў дачыненні да 7 юрыдычных і 25 фізічных асоб з Беларусі.
У санкцыйныя спісы ўвайшлі: Цэнтральная выбарчая камісія, ААТ “Інтэграл“, РУП “Беларускія латарэі“, ТАА “Рыдота“, ААТ “Планар“, РПУП “Завод дакладнай электрамеханікі“, а таксама ТАА “Цыбулька-Бел“ з аграгарадка Гуды Лідскага раёна (Гродзенская вобласць).
Раней паведамлялася, што ўладальнікам “Цыбулькі-Бел“ з’яўляецца дэпутат федэральнай зямлі Саксонія ад ультраправой партыі “Альтэрнатыва для Германіі“ Ёрг Дорнау, якога падазраюць у выкарыстанні працы беларускіх палітвязняў.
Таксама пад санкцыі з 27 сакавіка трапілі члены ЦВК: Аляксей Башан (намеснік старшыні), Алена Балдоўская (сакратар), Дзяніс Дук, Алена Кунцэвіч, Аляксандр Ткачоў, Кацярына Федосенка і Аляксандр Южык.
Абмежаванні ўведзеныя ў дачыненні да старшыні партыі “Белая Русь“ Алега Раманава, кіраўніка ўпраўлення справамі прэзідэнта Юрыя Назарава і яго намеснікаў Мікалая Шкрэда (першы намеснік), Антона Краеўскага і Мікалая Рагашчука.
У санкцыйны пакет дададзеныя кіраўнікі згаданых вышэй прадпрыемстваў: Дзмітрый Шведка (“Рыдота“), Міхаіл Дзенісенка (“Беларускія латарэі“), Юрый Чорны (Завод дакладнай электрамеханікі).
Санкцыйны спіс папоўнілі суддзі: Анастасія Папко (Мінскі гарадскі суд), Алег Каляда (суд Заводскага раёна Мінска), Сяргей Будрэвіч і Жанна Брысіна (суд Кастрычніцкага раёна Мінска), Алена Бушава і Ала Скуратовіч (суд Фрунзенскага раёна Мінска), Андрэй Васілюк (Брэсцкі абласны суд), Дзіна Кучук (Вярхоўны суд), Галіна Бондал (Віцебскі абласны суд).
Зыходзячы з парадкавых нумароў уключаных у спіс асоб, зараз пад санкцыямі Еўрасаюза знаходзяцца 312 фізічных і 47 юрыдычных беларускіх асоб.
19 сакавіка стала вядома, што тыя ж 8 краін далучыліся да іншага рашэння Савета Еўрапейскага саюза ад 24 лютага 2025 года (CFSP) 2025/3851 аб абмежавальных мерах у сувязі з сітуацыяй у Беларусі і яе ўдзелам ў расійскай агрэсіі супраць Украіны.
Гэтым рашэннем Савет ЕС пастанавіў захаваць дзейснымі да 28 лютага 2026 года раней прынятыя Еўрасаюзам санкцыйныя меры ў дачыненні да Беларусі праз унясенне ў адпаведны дакумент некаторых тэхнічных правак.
4 з 8 згаданых краін (Албанія, Боснія і Герцагавіна, Паўночная Македонія і Украіна) маюць статус кандыдатаў на ўступленне ў ЕС.
