Найбольш высокі ўзровень суіцыдаў у 2024 годзе адзначаны ў Мінску — РНПЦ псіхічнага здароўя
16 красавіка, Позірк. Згодна з аператыўнай інфармацыяй устаноў аховы здароўя, найбольш высокі ўзровень суіцыдаў у Беларусі ў 2024 годзе быў у Мінску — 9,2 выпадку на 100 тыс. насельніцтва, паведаміла намеснік дырэктара па медыцынскай частцы РНПЦ псіхічнага здароўя Аксана Шылава на міжнародным медыцынскім форуме “Ахова здароўя Беларусі“ ў Мінску 16 красавіка.
Паводле яе слоў, найменшы ўзровень суіцыдаў зарэгістраваны ў Мінскай вобласці (5,02).
Агулам па краіне захоўваецца тэндэнцыя змяншэння колькасці самагубстваў, сказала псіхіятр, адзначыўшы, што 30 гадоў таму ўзровень суіцыдаў быў у некалькі разоў большым.
У той жа час яна прызнала праблему павелічэння колькасці парасуіцыдаў (наўмыснае прычыненне шкоды свайму здароўю, якое не мае мэтай пазбавіць сябе жыцця; дэманстратыўная, звычайна няўдалая, спроба самагубства) у 2024 годзе на 5,8% сярод падлеткаў.