На Светлагорскім ЦКК здарыўся пажар

18 красавіка, Позірк. Аб пажары на Светлагорскім цэлюлозна-кардонным камбінаце (Гомельская вобласць) паведаміла прэс-служба Міністэрства па надзвычайных сітуацыях.

Надзвычайнае здарэнне адбылося днём 18 красавіка.

“Пасля прыбыцця да месца выкліку работнікі МНС выявілі гарэнне транспартнай стужкі цэха на плошчы 20 квадратных метраў”, — гаворыцца ў прэс-рэлізе.

МНС адзначае, што ўзгаранне было “аператыўна ліквідаванае“.

8 чэрвеня 2023 года Следчы камітэт паведаміў пра гібель трох чалавек у выніку аварыі на Светлагорскім ЦКК, якая адбылася днём раней, яшчэ двое атрымалі “цялесныя пашкоджанні”.

Загінулыя — супрацоўнікі прадпрыемства ва ўзросце 31, 24 і 42 гадоў.

29 лістапада 2024 года суд прызнаў вінаватым у здарэнні намесніка начальніка цэха рэгенерацыі прадпрыемства і прыгаварыў да 5 гадоў пазбаўлення волі па ч.3 арт. 306 КК (парушэнне правілаў аховы працы, якое пацягнула па неасцярожнасці смерць двух або больш асоб). Кампенсацыя маральнай шкоды на карысць пацярпелых была вызначана ў памеры 560 тыс. рублёў (14 тыс. базавых велічынь).

Светлагорскі ЦКК — буйны вытворца сульфатнай беленай цэлюлозы, гофракардону, гофраскрыняў, паперы для гафрыравання і іншых прадуктаў з першасных і другасных папяровых валокнаў.

Мясцовая тэлекампанія “Ранак“, якая паведаміла пра выбух на прадпрыемстве, была разгромленая ўладамі.