Для грамадзян Беларусі бязвізавы рэжым наведвання Албаніі захоўваецца да 30 верасня
Руіны крэпасці Разафа ў Албаніі
5 траўня, Позірк. Грамадзяне Беларусі да 30 верасня 2025 года могуць наведваць Албанію без візы на тэрмін да 30 дзён, вынікае з інфармацыі на сайце Міністэрства еўрапейскіх і замежных спраў гэтай балканскай дзяржавы.
Урад Албаніі, як паведамляла 24 красавіка мясцовае інфармагенцтва ATA, ухваліў рашэнне прыпыніць дзеянне пагаднення з Саветам міністраў Беларусі аб узаемным скасаванні візавых патрабаванняў. У адпаведнасці з тым дакументам беларускія грамадзяне маглі знаходзіцца ў Албаніі без віз не больш як 30 дзён з даты ўезду, пры гэтым агульная працягласць знаходжання ў каляндарным годзе не мелася перавышаць 90 дзён.
Летась у траўні стала вядома, што албанскі ўрад часткова пастрожыў візавыя патрабаванні для грамадзян Беларусі ў плане знаходжання на тэрыторыі гэтай балканскай дзяржавы. У прыватнасці, з пераліку дакументаў, якія даюць права на бязвізавы ўезд, былі выключаныя дыпламатычныя і службовыя пашпарты.
