Брат Ігара Лосіка і яшчэ шэсць чалавек прызнаныя палітвязнямі

19 траўня, Позірк. Праваабаронцы 19 траўня прызналі палітычнымі вязнямі яшчэ сем чалавек, паведамляе праваабарончы цэнтр “Вясна“. Цяпер такі статус маюць 1.177 зняволеных.

Палітвязнямі прызнаныя зняволеныя пад варту і асуджаныя да пазбаўлення волі: унесеная ў “спіс экстрэмістаў“ у сакавіку 2024 года Ала Пучынская (ч. 2 арт. 361³ Крымінальнага кодэкса; удзел на тэрыторыі замежнай дзяржавы ва ўзброеным фармаванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу), а таксама Мікіта Лосік, Аляксей Кайдаш, Алег Лойка, Аляксандр Гардзеенка, Ганна Багінская і ўнесеная ў “спіс экстрэмістаў“ 8 траўня Вольга Аляксеева (усё паводле арт. 361⁴ КК; садзейнічанне экстрэмісцкай дзейнасці).

Пра затрыманне 25-гадовага Мікіты Лосіка — малодшага брата палітвязня Ігара лосіка — стала вядома 9 траўня. Ён пражывае ў Оршы (Віцебская вобласць).

Паводле інфармацыі “Радыё Свабода”, дзе працаваў Лосік-старэйшы, брат змешчаны ў следчы ізалятар Віцебска. Супраць яго распачатая справа за перадачу інфармацыі маніторынгаваму праекту “Беларускі Гаюн”.

14 снежня 2021 года Ігар Лосік — фігурант “справы Ціханоўскага” — быў прыгавораны да 15 гадоў пазбаўлення волі па арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) і арт. 293 (масавыя беспарадкі) КК. Утрымліваецца ў ПК № 1 (Наваполацк, Віцебская вобласць) у рэжыме інкамунікада.

На той момант ягоная жонка Дар’я Лосік пасля затрымання 18 кастрычніка 2022 года была асуджаная паводле ч. 1 арт. 361⁴ КК на два гады пазбаўлення волі за інтэрв’ю тэлеканалу “Белсат”. Выйшла на волю па памілаванні 3 ліпеня 2024 года незадоўга да заканчэння тэрміну зняволення. Шлюб быў скасаваны, калі Дар’я Лосік знаходзілася ў зняволенні, з яе ініцыятывы, паведамлялі СМІ.

Праваабаронцы патрабуюць ад уладаў неадкладна вызваліць усіх палітвязняў і спыніць рэпрэсіі.

Адпаведную заяву акрамя “Вясны“ падпісалі “Прававая ініцыятыва”, Беларуская асацыяцыя журналістаў, Respect-Protect-Fulfill, Lawtrend, Беларускі ПЭН, Human Constanta.