Лукашэнка прапанаваў “вярнуцца да тэмы” дэпазітна-закладнога абароту тары са шкла і пластыка — на базе дзяржпрадпрыемстваў

20 траўня, Позірк. У 2019 годзе ўрад “не змог выразна абгрунтаваць” неабходнасць стварэння разам з прыватным інвестарам сістэмы дэпазітна-закладнога абароту тары са шкла і пластыка, заявіў Аляксандр Лукашэнка 20 траўня ў Мінску на нарадзе па пытаннях абыходжання з адкідамі і выкарыстання другасных матэрыяльных рэсурсаў.

“Што з пілотнымі праектамі, якія так гучна анансаваліся? Можа быць, сёння варта вярнуцца да гэтай тэмы, але ўжо на базе кааперацыі холдынгу “Белрэсурсы” і Беларускай шкляной кампаніі?” — цытуе спікера яго прэс-служба.

Пра тое, што тэрмін увядзення дэпазітна-закладной сістэмы абароту шклотары “перанесены на пасля 2030 года”, паведаміла на прэс-канферэнцыі 7 чэрвеня 2024 года начальніца галоўнага ўпраўлення рэгулявання абыходжання з адкідамі, біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Вольга Сазонава.

Раней дэпазітную сістэму планавалася ўкараніць у 2020–2021 гадах і ўключыць у яе спажывецкую ўпакоўку для харчовых прадуктаў ёмістасцю 0,1–3 літра — пластыкавыя (палімерныя), шкляныя бутэлькі, металічныя банкі (бляха, алюміній і яго сплавы). Аднак урад сваёй пастановай № 759 ад 24 снежня 2021 года перанёс тэрмін на 2024-ы.

Аўтары адпаведнай канцэпцыі сцвярджалі, што сістэма дазволіць павялічыць у 2,1–2,4 раза збор адкідаў упакоўкі, у першую чаргу ПЭТ-бутэлек (у 3–3,3 раза); знізіць аб’ём пахавання камунальных адкідаў на 10% (для спажыўцоў чакаецца скарачэнне платы за паслугу абыходжання з ТКА на 10%); дадаткова сабраць і перапрацаваць каля 85 тыс. тон адкідаў шкла, 23 тыс. т ададкідаў ПЭТ і 360 т ададкідаў алюмінію.