Па выніках першага квартала Беларусь не была лідарам у ЕАЭС ні па адным з сямі асноўных эканамічных паказчыкаў

21 траўня, Позірк. Па выніках студзеня — сакавіка 2025 года Беларусь не была лідарам у Еўразійскім эканамічным саюзе (ЕАЭС) ні па адным з сямі асноўных сацыяльна-эканамічных паказчыкаў, сведчыць праведзены “Позіркам“ аналіз даных Еўразійскай эканамічнай камісіі (ЕЭК).

Аб’ём выкананых будаўнічых (падрадных) работ у цэлым па ЕАЭС вырас у першым квартале на 7,9%: у Казахстане — на 16,9%, Беларусі — на 15,8%, Арменіі — на 15,7%, Кыргызстане — на 13,1%, Расіі — на 6,9%.

Абарот рознічнага гандлю стаў большы на 3,9%: у Кыргызстане — на 22,8%, Беларусі — на 10,8%, Арменіі — на 7,3%, Казахстане — на 4,8%, Расіі — на 3,2%.

Прамысловая вытворчасць павялічылася на 1,5%: у Кыргызстане — на 16,3%, Казахстане — на 6,7%, Беларусі — на 2,1%, Расіі — на 1,1%; у Арменіі зменшылася на 18,5%.

Увод у эксплуатацыю жылля вырас на 9,4%: у Арменіі — у 1,9 раза, Кыргызстане — на 32,2%, Беларусі — на 18%, Расіі — на 8,9%, Казахстане — на 7,4%.

Пасажыраабарот па ўсіх відах транспарту стаў большы на 2,5%: у Казахстане — на 14%, Кыргызстане — на 7,3%, Беларусі — на 7,1%, Расіі — на 0,5%; у Арменіі знізіўся на 17%.

Грузаабарот усіх відаў транспарту павялічыўся на 0,5%: у Казахстане на 14,3%, Кыргызстане — на 10%; у Расіі зменшыўся на 0,6%, Беларусі — на 2,7%, Арменіі — на 2,9%.

Вытворчасць прадукцыі сельскай гаспадаркі вырасла на 2,1%: у Арменіі — на 10%, Казахстане — на 3,7%, Кыргызстане — на 2,5%, Беларусі і Расіі — на 1,7%.

Па выніках студзеня Беларусь была на першым месцы па адным паказчыку — уводу ў эксплуатацыю жылля (+34,2%), студзеня — лютага лідзіравала па двух — аб’ёме выкананых будаўнічых работ (+15,6%) і ўводу ў эксплуатацыю жылля (25,5%).

Да гэтага пяць месяцаў запар, са жніўня па снежань 2024-га, у Беларусі не было лідарства ні па адным з названых індыкатараў. У студзені — ліпені мінулага года яна была на першым месцы па двух паказчыках — вытворчасці прадукцыі сельскай гаспадаркі (+18,1%) і грузаабароце ўсімі відамі транспарту (+3,8%).

ЕАЭС — арганізацыя рэгіянальнай эканамічнай інтэграцыі, якая валодае міжнароднай правасуб’ектнасцю. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), а таксама Арменія (з 2 студзеня 2015 года) і Кыргызстан (з 12 жніўня 2015 года). Краіны-назіральнікі — Куба, Малдова, Узбекістан. Пагадненне аб зоне свабоднага гандлю з ЕАЭС падпісалі В’етнам, Сербія і Сінгапур.