23 траўня, Позірк. За тыдзень (з 6:00 16 траўня да 6:00 23 траўня) у Беларусь прыбыло 9.924 грамадзяніна Украіны (за два тыдні з 2 траўня да 16 траўня — 16.260), вынікае са звестак Дзяржаўнага пагранічнага камітэта.
Транзітам праз Польшчу прайшло 8.000 (13.040) украінскіх грамадзян, Літву — 1.864 (3.068), Латвію — 60 (152). Непасрэдна праз украінска-беларускую мяжу — зноў ніводнага (апошні раз ведамства паведамляла аб адным такім грамадзяніне ў зводцы за 25 красавіка).
Усяго з 24 лютага 2022 года (пачатак поўнамаштабнага ўварвання РФ) у Беларусь прыбыло 422.333 грамадзяніна Украіны: праз украінска-беларускую мяжу — 16.002, транзітам праз Польшчу — 317.458, Літву — 78.924, Латвію — 8.085.
Паводле інфармацыі Дзяржпагранкамітэта, за 2024 год у Беларусь заехаў 134 561 грамадзянін Украіны. У прыватнасці, як сцвярджалася, з тэрыторыі Украіны гэта зрабіла 68 чалавек, транзітам праз Польшчу — 107.154, Літву — 25.362, Латвію — 1.977. Паводле прыбдізных разлікаў “Позірку”, у 2023 годзе ў Беларусь заехала больш за 71 тыс. грамадзян Украіны, такім чынам, за год іх колькасць вырасла прыкладна ў 1,9 раза.
Пад выглядам “добрапарадкавых грамадзян Украіны” ў Беларусь і Расію “сталі прыбываць людзі на падставе заданняў спецслужбаў украінскага боку або краін ЕС”, з такім сцвярджэннем выступіў у апублікаваным 28 сакавіка інтэрв’ю дзяржгазеце “СБ. Беларусь сёння” начальнік галоўнага ўпраўлення па барацьбе з арганізаванай злачыннасцю і карупцыяй МУС Андрэй Ананенка.
Паводле яго слоў, гэта стала адбывацца “пасля пачатку СВА” (“спецыяльнай ваеннай аперацыяй” улады расійскія і беларускія ўлады называюць поўнамаштабную вайну, якую Масква вядзе супраць Украіны з 24 лютага 2022 года).
Мэтай згаданых візіцёраў, як сцвярджае Ананенка, з’яўляецца “дэстабілізацыя грамадска-палітычнай абстаноўкі на пэўных этапах або правядзенне выведніцкіх мерапрыемстваў у дачыненні да вайсковых структур, органаў дзяржулады і кіравання”.
“Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, — заявіў у інтэрв’ю “Позірку” ў лютым 2024 года Ігар Кізім, які на той момант займаў пасаду амбасадара па асаблівых даручэннях МЗС Украіны па Беларусі. Паводле яго слоў, гаворку трэба весці пра звычайныя паездкі грамадзян Украіны ў Беларусь.
Дыпламат адзначаў, што ў адкрытых крыніцах звестак пра колькасць украінцаў, якія выехалі з Беларусі, не знайсці. “Сумленным і прыстойным з боку ДПК было б даваць гэтую статыстыку”, — лічыў ён.
Паводле даных ААН, на 17 красавіка 2025 года па ўсім свеце налічвалася 6.917.800 украінскіх уцекачоў. Амаль за месяц (з 20 сакавіка) іх колькасць зменшылася на 14.900 чалавек, прычым усе яны былі зарэгістраваны ў Еўропе, цяпер такіх 6.357.600. Па-за межамі Еўропы, як і на 20 сакавіка, зарэгістравана 560.200 украінскіх уцекачоў.
