На аўкцыёне прададзены аўтамабіль завочна асуджанага Ежы Грыгенчы — экс-каардынатара групы Канапацкай на выбарах-2020

23 траўня, Позірк. На электронным аўкцыёне за 18.078 рублёў прададзены аўтамабіль “Фольксваген Транспарцёр” грамадскага актывіста Ежы Грыгенчы — у лік кампенсацыі налічанага судом штрафу, вынікае з апісання лота на пляцоўцы e-auction.by.

Аўтамабіль зроблены ў 2000 годзе, яго пачатковая цана складала 13.800 рублёў.

Аўкцыён адбыўся 20 траўня.

Раней на сваёй старонцы ў “Фэйсбуку” Грыгенча паведаміў, што транспартны сродак належыць яго жонцы. Таргі ён назваў “рабаваннем”.

21 лістапада 2024 года стала вядома, што Гродзенскі абласны суд завочна прыгаварыў Грыгенчу да шасці гадоў пазбаўлення волі і аштрафаваў на 40 тыс. рублёў (1 тыс. базавых велічынь).

Актывіста прызналі вінаватым паводле ч. 1 арт. 361⁴ (садзейнічанне экстрэмісцкай дзейнасці), ч. 1 арт. 368 (абраза прэзідэнта), ч. 1 арт. 367 (паклёп у дачыненні да прэзідэнта) і ч. 1 арт. 130 (распальванне расавай, нацыянальнай, рэлігійнай ці іншай сацыяльнай варожасці ці варажнечы) Крымінальнага кодэкса.

Спецыяльную вытворчасць у дачыненні да Грыгенчы Следчы камітэт распачаў 2 траўня 2024 года.

Грыгенча быў каардынатарам ініцыятыўнай групы Ганны Канапацкай на прэзідэнцкіх выбарах 2020 года, пражывае ў Беластоку (Польшча), неаднаразова затрымліваўся за ўдзел у розных пратэстных акцыях яшчэ да выбараў 2020 года.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фармавання альбо ўдзел у ім, масавыя беспарадкі, заклікі да санкцый і інш.