Партнёры зрабілі памылку, недаацаніўшы значэнне Беларусі, лічыць Латушка

25 траўня, Позірк. Сённяшнія партнёры беларускіх дэмакратычных сіл зрабілі памылку — недаацанілі значэнне Беларусі, вынікае з слоў намесніка кіраўніцы Аб’яднанага пераходнага кабінета (АПК), кіраўніка Народнага антыкрызіснага ўпраўлення Паўла Латушкі 24 траўня ў Варшаве на IV Канферэнцыі беларусаў свету.

Паводле сцвярджэння палітыка, адзін “высокапастаўлены еўрапейскі дыпламат” выказаў яму меркаванне, што калі б у 2020 годзе еўрапейскія краіны прынялі “адпаведную стратэгію” ў дачыненні да Беларусі, магчыма, “можна было б пазбегнуць вайны” ва Украіне.

“У Еўропе прызналі, што не разумелі, што будзе адбывацца з [Аляксандрам] Лукашэнкам пасля 2020 года, што гэта можа прывесці ў тым ліку да вайны ў 2022 годзе”, — заявіў Латушка.

На сустрэчах з еўрапейскімі партнёрамі беларускія дэмакратычныя сілы, падкрэсліў палітык, заўсёды артыкулюць, што “беларускі балкон” — гэта “тая тэрыторыя, якая мае стратэгічнае значэнне з пункту гледжання вырашэння сітуацыі з бяспекай у свеце ў кантэксце той вайны, якая вядзецца”.

На жаль, працягнуў спікер, сёння можна канстатаваць, што “еўрапейскія партнёры пакуль не дайшлі да разумення важнасці ролі Беларусі ў сітуацыі ва Украіне”. “Няма разумення таго, што Беларусь чарговы раз можа быць скарыстаная ў вайне — супраць Еўрапейскага саюза”, — адзначыў ён.

У Еўропе, на думку Латушкі, таксама “няма разумення”, што ў Беларусі “іншае грамадства, чым у Расіі, што беларусы — гэта не рускія, што большасць беларусаў — за дэмакратыю, супраць вайны, а ў Расіі большасць — за Пуціна, за вайну і не за дэмакратыю”.

Намеснік кіраўніцы АПК заклікаў усіх удзельнікаў канферэнцыі распавядаць у краінах, у якіх яны знаходзяцца, пра згаданыя ім адрозненні Беларусі ад РФ.