Зборы ваеннаабавязаных тэрытарыяльных войскаў праходзяць у Магілёўскай вобласці

27 траўня, Позірк. Для камплектавання тэрытарыяльных войскаў Чэрыкаўскага і Краснапольскага раёнаў (Магілёўская вобласць) 27 траўня праводзіцца зборы з ваеннаабавязанымі, паведамляе прэс-служба Міністэрства абароны.

Адзначаецца, што на зборах, якія заяўленыя як “планавыя” і “навучальныя”, будзе адпрацаваны “комплекс мерапрыемстваў, скіраваны на падвышэнне навыкаў службовых асоб выканаўчых камітэтаў у пытаннях фармавання і падрыхтоўкі тэрытарыяльных войскаў да выканання задач”.

Асноўная ўвага, паведамляе ведамства, будзе нададзеная “сумеснаму выкананню задач разнастайнымі сіламі тэрытарыяльнай абароны, у тым ліку тэрытарыяльнымі войскамі, органамі ўнутраных спраў, а таксама падраздзяленнямі ўнутраных войскаў”.

Пра правядзенне збораў ваеннаабавязаных тэрытарыяльных войскаў Брэсцкай вобласці Мінабароны паведамляла 13 траўня, вучэнняў з войскамі тэраабароны ў Гродне — 17 красавіка.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама вайсковымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.

Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.