Пад Мазырам адбылася ўцечка нафты

2 чэрвеня, Позірк. Аб выцяканні нафтапрадуктаў з магістральнага нафтаправода Мазыр — Брэст ААТ “Гомельтранснафта“ Дружба” ў Мазырскім раёне (Гомельская вобласць) паведаміла Міністэрства прыродных рэсурсаў і аховы навакольнага асяроддзя.

Удакладняецца, што на месца “неадкладна выехалі“ прадстаўнікі Мазырскай раённай інспекцыі прыродных рэсурсаў і аховы навакольнага асяроддзя, РАНС, Праматамнагляду, раённага цэнтра гігіены і эпідэміялогіі, а таксама раённага выканаўчага камітэта. 

Для вызначэння плошчы і ступені забруджвання глебы нафтапрадуктамі прыцягнута лабараторыя Рэспубліканскага цэнтра аналітычнага кантролю ў галіне аховы навакольнага асяроддзя, ініцыявана пасяджэнне камісіі па надзвычайных сітуацыях у мясцовым райвыканкаме “для выпрацоўкі дадатковых мер па ліквідацыі праліва“.

Аварыйнай службай “Гомельтранснафта “Дружба” праводзяцца аварыйна-аднаўленчыя работы, вядзецца адпампоўка нафтапрадуктаў.

Прычыны ўзнікнення аварыйнай сітуацыі “ўдакладняюцца”.  

“Інцыдэнт лакалізаваны. Трапленне нафтапрадуктаў у водныя аб’екты не зафіксавана”, — заявіла ведамства.