Для затрымання нецвярозага кіроўцы ў Гомельскай вобласці міліцыі давялося страляць
16 чэрвеня, Позірк. Для затрымання нецвярозага кіроўцы ў ноч на 16 чэрвеня ў Гомельскай вобласці супрацоўнікам Дзяржаўтаінспекцыі давялося страляць, вынікае з інфармацыі прэс-службы Міністэрства ўнутраных справаў.
Паводле інфармацыі ведамства, у аграгарадку Ламавічы (Кастрычніцкі раён) увагу экіпажа ДАІ прыцягнуў аўтамабіль “Фальксваген”. Міліцыянеры “падалі сігнал на спыненне”, аднак кіроўца “патрабаванне праігнараваў”, пасля чаго “пачаўся пераслед”.
“Спрабуючы не даць сябе апярэдзіць, парушальнік віхляў па праезнай частцы, ствараючы рэальную пагрозу іншым удзельнікам дарожнага руху, — гаворыцца ў паведамленні. — Для спынення выкарыстоўвалася табельная зброя. З мэтай спынення супрацьпраўных дзеянняў кіроўцу і пасажыра (абодва з відавочнымі прыкметамі ап’янення) затрымалі”.
МУС заяўляе, што за стырном “Фальксвагена” быў 41-гадовы мясцовы жыхар, якога раней неаднаразова пазбаўлялі правоў кіроўцы. Ад праходжання медагляду ён адмовіўся.
Паводле інфармацыі ведамства, у дачыненні да парушальніка “складзена шэсць адміністрацыйных матэрыялаў”. “За непадпарадкаванне і абразу супрацоўнікаў міліцыі пры выкананні кіроўца змешчаны ў ІЧУ. Транспартны сродак дастаўлены на ахоўную стаянку”, — адзначыла МУС.
11 лютага паведамлялася пра выкарыстанне ДАІ табельнай зброі для затрымання парушальніка ў Асіповіцкім раёне, 9 лютага — у Чэрыкаўскім раёне (абодва — Магілёўская вобласць), 29 студзеня — у Мазырскім раёне (Гомельская вобласць).
