“Экстрэмісцкімі фарміраваннямі” прызнаны праекты Petitions.bу і Adu.plасе

19 чэрвеня, Позірк. Міністэрства ўнутраных спраў 18 чэрвеня прызнала “экстрэмісцкім фарміраваннем” праект Petitions.bу, вынікае з абноўленага спісу на сайце МУС.

Датычным да яго дзейнасці названы эканаміст Уладзімір Кавалкін. У склад “фарміравання” ўключылі таксама сайт праекта і яго акаўнты ў сацсетках.

Таксама ў спіс рашэннем КДБ ад 10 чэрвеня дададзены праект “Adu.plасе”, яго акаўнты ў сацсетках і сайт. Дачыненне да яго, як сцвярджае ведамства, маюць Дар’я Рублеўская, Кацярына Буніна, Ганна Комлач і Вера Моніна.

Акрамя таго, КДБ абнавіў спіс датычных да “экстрэмісцкага фарміравання” “Честные люди” — у спіс дадалі Алену Жылачкіну (Жываглод), Зарыну Сарокіну (Жываглод), Цімафея Малахоўскага, Алега Давыдчыка. У “фарміраванне” уключаны сайт і акаўнты праекта ў сацсетках.

“Честные люди” артымалі “экстрэмістскі” статус яшчэ ў 2022 годзе.

Petitions.by — сэрвіс для падачы публічных калектыўных зваротаў да органаў улады. З 2021 году заблакаваны ў Беларусі.

Adu.plасе — збірае адукацыйныя магчымасці, стыпендыі з усяго свету і публікуе адпаведны кантэнт для беларускай моладзі, у красавіку сацсеткі праекту былі прызнаны “экстрэмістскімі матэрыяламі”.

У спісе “экстрэмісцкіх фарміраванняў” цяпер 296 пазіцый.