23 чэрвеня, Позірк. Пра пачатак лётна-тактычных вучэнняў з авіяцыяй Ваенна-паветраных сіл і войскаў супрацьпаветранай абароны паведамляе прэс-служба Міністэрства абароны.
Вучэнні будуць праходзіць 23–27 чэрвеня, месца іх правядзення не ўдакладняецца.
Заяўляецца, што будуць адпрацаваныя пытанні “вываду авіяцыйных падраздзяленняў з-пад умоўнага ўдару сродкаў паветранага нападу праціўніка”, “авіяцыйнай падтрымкі войскаў, якія ажыццяўляюць пошук, блакаванне, знішчэнне наземнага праціўніка”, “нанясення авіяцыйных удараў па наземных цэлях”.
Таксама ў праграме вучэнняў “вядзенне паветранай выведкі”, “нанясенне авіяцыйных удараў па выяўленых цэлях”, “выкананне транспартна-дэсантных задач”, “адбіццё ўдараў сродкаў паветранага нападу праціўніка”, “эвакуацыя лётнага складу, які пацярпеў бедства”, гаворыцца ў паведамленні.
“Асноўная ўвага будзе нададзена ўдасканаленню камандзірскай вывучкі і практычных навыкаў лётных экіпажаў падчас вядзення баявых дзеянняў, выпрацоўцы ў асабістага складу высокіх баявых і маральна-псіхалагічных якасцяў”, — падкрэслівае ведамства.
Рэжым Аляксандра Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
