Нацбанк упершыню за два гады мяняе стаўку рэфінансавання, яна вырасце да 9,75%
23 чэрвеня, Позірк. Стаўка рэфінансавання 25 чэрвеня будзе павышана з 9,5 да 9,75% гадавых, такое рашэнне прынята 23 чэрвеня па выніках пасяджэння праўлення Нацыянальнага банка, прысвечанага развіццю сітуацыі ў эканоміцы і грашова-крэдытнай сферы.
Прычынамі прэс-служба рэгулятара называе “рызыкі, звязаныя з падвышанай траекторыяй інфляцыі”, а таксама “стымуляванне інвестыцыйнай актыўнасці”.
Паведамляецца таксама аб павышэнні да 11,25% гадавых ставак па пастаянна даступных аперацыях падтрымкі ліквіднасці (крэдыт овернайт, СВОП овернайт) і двухбаковых аперацыях падтрымкі ліквіднасці (ламбардныя крэдыты па фіксаванай стаўцы і здзелкі СВОП).
“Аналіз паказвае, што, нягледзячы на захаванне станоўчай дынамікі эканамічнага росту, узмацняецца макраэканамічны дысбаланс, выкліканы нарошчваннем разрыву паміж тэмпамі росту прадукцыйнасці працы і заработнай платы”, — заявіў старшыня праўлення Нацбанка Раман Галоўчанка.
Паводле яго слоў, у выніку павышэння заробкаў адбываецца “рост спажывання, які прыводзіць да істотнага павелічэння спажывецкага імпарту”. Рост даходаў, дадаў ён, “павышае крэдытаздольнасць грамадзян, што ў сваю чаргу вядзе да падвышанага попыту на імпартныя тавары працяглага карыстання”.
Галоўчанка адзначыў, што аб’ём спажывецкага імпарту за чатыры месяцы 2025 вырас на 14,5%, што “таксама сведчыць пра рызыкі павышэння ціску на сальда бягучага рахунку плацежнага балансу”.
“Пры гэтым назіраецца ўстойлівы прафіцыт ліквіднасці ў банкаўскай сістэме і рост грашовай масы ў гадавым выражэнні на ўзроўні вышэй за 15%. З улікам існуючай павышанай траекторыі інфляцыі праўленне Нацыянальнага банка лічыць неабходным прыняцце рашэнняў, накіраваных на павышэнне прывабнасці зберажэнняў у эканоміцы і, як следства, рост рэсурснай базы для інвестыцыйнай актыўнасці”, — адзначыў Галоўчанка.
У фокусе ўвагі Нацбанка “па-ранейшаму застаецца захаванне даступнасці інвестыцыйнага банкаўскага фінансавання, якое спрыяе ўстойліваму і збалансаванаму эканамічнаму росту краіны”, сказаў кіраўнік рэгулятара.
На яго думку, прынятыя меры будуць спрыяць “узмацненню ашчаднай актыўнасці эканамічных суб’ектаў, зніжэння інтэнсіўнасці інфляцыйных працэсаў у краіне і, адпаведна, падтрыманню пакупніцкай здольнасці даходаў насельніцтва”.
Нацыянальны банк, як паведамляецца, працягне “старанна аналізаваць развіццё сітуацыі ў эканоміцы краіны” і пры неабходнасці прыме адпаведныя меры ў галіне грашова-крэдытнай палітыкі.
30 студзеня першы намеснік старшыні Нацыянальнага банка Сяргей Калечыц заяўляў, што “пры адсутнасці рызык для цэнавай і фінансавай стабільнасці чакаецца паступовае зніжэнне працэнтных ставак у эканоміцы”, “пры спрыяльным развіцці сітуацыі” стаўка рэфінансавання ў сярэднім за 2025 год можа скласціся на ўзроўні 9–9,3% гадавых.
У бюлетэні даследчага цэнтра BEROC “Маніторынг эканомікі Беларусі: тэндэнцыі, настроі і чаканні. Люты 2025 г.” паведамлялася, што палітыка, якая праводзіцца Нацыянальным банкам, “не адпавядае рэальнаму становішчу спраў”, бягучыя ўмовы “патрабуюць умеранага ўзмацнення жорсткасці грашова-крэдытнай палітыкі”, аднак рэгулятар “пазбягае прыняцця рашэнняў датычна стаўкі рэфінансавання”.
Нацбанк панізіў стаўку рэфінансавання з 9,75 да 9,5% гадавых 28 чэрвеня 2023 года. На працягу 2023 года стаўка пастаянна паніжалася: 23 студзеня — з 12 да 11,5%, 1 сакавіка — да 11%, 3 красавіка — да 10,5%, 2 траўня — да 10%, 31 траўня — да 9,75%.
Раней стаўка ў апошні раз павышалася 1 сакавіка 2022 года — з 9,25 да 12%.
