У Польшчы канфіскавана амаль 190 тыс. нелегальных беларускіх цыгарэт

23 чэрвеня, Позірк. Амаль 190 тыс. беларускіх цыгарэт выявіла паліцыя ў Нідзіцкім павеце ў паўночна-ўсходняй частцы Польшчы ў спыненым для праверкі 20 чэрвеня легкавым аўтамабілі “Таёта”, паведаміла Памежная ахова краіны.

Цыгарэты канфіскаваныя супрацоўнікамі памежнага паста ў Ольштыне сумесна з супрацоўнікамі Вармінска-Мазурскага мытна-фіскальнага ўпраўлення. Іх ацэначны кошт складае больш за 166 тыс. злотых (44,6 тыс. долараў ЗША).

Адзначаецца, што 60-гадоваму мужчыну (грамадзянства не паведамляецца) “пагражае вялікі штраф за перавозку нелегальных тытунёвых вырабаў“.

Калі б нелегальныя цыгарэты патрапілі на польскі рынак, страты дзяржаўнай казны склалі б амаль 283 тыс. злотых (больш за 76 тыс. долараў), адзначае памежная служба.

19 чэрвеня паведамлялася, што ў Сувалках, непадалёк ад мяжы Польшчы з Беларуссю і Літвой, спыненая кантрабанда 10 тон сушанага курыльнага тытуню без польскіх акцызных марак. Вытворца тытуню не называўся, за рулём аўтамабіля знаходзіўся грамадзянін Беларусі, кошт канфіскаванага тавару ацэньваецца прыкладна ў 9 млн злотых (больш за 2,4 млн долараў).