16 ліпеня, Позірк. Супрацоўнікі патрульна-паставой службы варшаўскага раёна Бемава затрымалі грамадзяніна Беларусі, які падазраецца ў махлярстве з выкарыстаннем сістэмы мабільных плацяжоў BLIK, паведаміла паліцыя польскай сталіцы.
Як адзначаецца, патрульныя “атрымалі інфармацыю пра тое, што мужчына стаіць каля банкамата, нервова азіраецца і здымае грошы”. “Маючы абгрунтаваныя падазрэнні, што ён можа здымаць грошы, выкарыстоўваючы незаконна атрыманыя BLIK-коды, паліцэйскія вырашылі правесці расследаванне. 27-гадовы грамадзянін Беларусі спачатку адмовіўся даць свае персанальныя звесткі, але пазней патлумачыў паліцэйскім, што здымае грошы, выкарыстоўваючы BLIK-коды, і што гэта грошы ад сябра на куплю ноўтбука”, — гаворыцца ў рэлізе.
Паведамляецца, што “паліцыя не паверыла яму і старанна праверыла паходжанне грошай”. “Высветлілася, што гэта была гатоўка, атрыманая злачынным шляхам з выкарыстаннем сістэмы BLIK. Злачынец вымагаў у ахвяры грошы, выдаючы сябе за супрацоўніка банка і паведамляючы ёй, што яе грошы знаходзяцца ў небяспецы”, — падкрэслілі ў паліцыі.
У затрыманага канфіскавана больш за 10 тыс. злотых гатоўкай (больш за 2,7 тыс. долараў) і мабільны тэлефон.
Узбуджаная крымінальная справа, абвінавачаны ў махлярстве змешчаны пад нагляд паліцыі, яму забаронена пакідаць тэрыторыю Польшчы. Беларусу пагражае да 8 гадоў пазбаўлення волі.
