Паўторнага размыву грунту ў віцебскім Вярхоўі не будзе, запэўніваюць абласныя ўлады
Вярхоўе, Віцебск
26 ліпеня, Позірк. Паўторнага размыву грунту ў аддаленым віцебскім мікрараёне Вярхоўе не будзе, сцвярджаецца ў заяве аблвыканкама.
“На гэты момант кампетэнтнымі службамі высветленая адсутнасць небяспекі паўторнага абвальвання пароды ў месцы выканання работ”, — паведаміла прэс-служба абласной адміністрацыі каля 18:30 26 ліпеня.
Заяўлена, што “пацярпелых і траўмаваных грамадзян няма”. У ліквідацыі наступстваў ранішняга размыву грунту ў мікрараёне задзейнічана 23 адзінкі тэхнікі, прыцягнута 60 адмыслоўцаў розных службаў.
“На гарачую лінію зваротаў ад грамадзян не паступала”, — сцвярджае аблвыканкам.
Раніцай 26 ліпеня Міністэрства па надзвычайных сітуацыях паведаміла, што праз падмыты грунт абрынулася сем гаспадарчых пабудоў у раёне вул. Садовай у Вярхоўі — пасёлку-эксклаве на беразе Заходняй Дзвіны, які ўваходзіць у склад Чыгуначнага раёна Віцебска, але аддзелены ад асноўнай часткі абласнога цэнтра тэрыторыяй Віцебскага раёна.
Адзначалася, што разбураны “тэхнічны праезд памерам 4×70 м, з далейшым зрушэннем грунта ва ўчастак ракі Заходняя Дзвіна на прыкладнай плошчы 100×100 кв. м”.
У сярэдзіне дня МНС праінфармавала, што “на месцы зрушэння грунту <…> вядуцца аднаўленчыя работы”. Віцебскі гарвыканкам заявіў, што арганізацыі горада і супрацоўнікі міністэрства займаюцца ўмацаваннем берагавой лініі.
Пазней начальнік Віцебскага абласнога ўпраўлення МНС і член Савета Рэспублікі Сяргей Мялешкін паведаміў, што “для вывучэння наступстваў абвальвання грунту ў Вярхоўі створаныя адмысловыя працоўныя групы”.
“Ужо прайшла сустрэча з грамадзянамі ля крамы. Цяпер пачалі падомавы абход. Сфармаваныя групы з прадстаўнікоў органаў улады, МНС, праваахоўных органаў для працы з насельніцтвам. Дадаткова вывучаецца сітуацыя на дзвюх падтопленых вуліцах у Вярхоўі. Даследуюцца меліярацыйныя сістэмы, залеўная каналізацыя. Арганізаваная падрыхтоўка дадатковых каналаў для спуску вады. Адноўлена электразабеспячэнне. Праблемных пытанняў, якія не вырашаюцца, няма”, — заявіў ён.
