Пры ўездзе ў Беларусь затрыманы грамадзянін Аўстрыі з марыхуанай

7 жніўня, Позірк. Аб затрыманні на мяжы з Польшчай 46-гадовага грамадзяніна Аўстрыі паведаміла прэс-служба Дзяржаўнага пагранічнага камітэта (ДПК).

Паводле звестак ведамства, у канцы ліпеня ў пункце пропуску Брэст “службовы сабака зрэагаваў на пах забароненага рэчыва, якое знаходзіцца ў кішэні аднаго з праязджаючых”.

Адзначаецца, што ў мужчыны выяўленая “цыгарэта з небяспечным наркатычным сродкам — марыхуанай (0,56 грама)”. Даследаванні паказалі “станоўчы вынік на наяўнасць у арганізме затрыманага гэтага наркотыку”.

Акрамя таго, паводле звестак ДПК, аўстрыйца ў 2021 годзе “затрымлівалі ў Германіі за аналагічнае злачынства”.

Узбуджаныя дзве крымінальныя справы. Паведамляецца, што аўстрыйскаму грамадзяніну пагражае да сямі гадоў пазбаўлення волі.

За першыя шэсць месяцаў 2025 года колькасць асуджаных паводле “антынаркатычных” артыкулаў Крымінальнага кодэкса (327–332) павялічылася на 2,9% у параўнанні з адпаведным перыядам мінулага года, вынікае са статыстычных звестак на сайце Вярхоўнага суда.

Раней паведамлялася, што з 28 ліпеня па 4 жніўня ў Беларусь без віз уехала 6.647 грамадзян еўрапейскіх дзяржаў.

Усяго з 15 красавіка 2022 года ў рамках бязвізу краіну наведаў 1.171.521 жыхар Еўропы. Сярод іх 638.578 грамадзян Літвы, 373.301 грамадзянін і неграмадзянін Латвіі, 118.748 грамадзян Польшчы і 40.894 — краін пашыранага бязвізу.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — Польшчы. 19 ліпеня 2024-га беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гл. таксама:

14-гадовай мінскай ўкольніцы пагражае да 20 гадоў пазбаўлення волі за збыт наркотыкаў — СК

41-гадовы беларус затрыманы пры спробе ўвозу з Літвы цыгарэт з марыхуанай

Перакрыты чарговы канал пастаўкі псіхатропаў з РФ у Беларусь, наркакур’ерам пагражае да 15 гадоў пазбаўлення волі — ДМК