У Віцебску міліцыя са стральбой папярэдзіла спробу забойства непаўналетняй

21 жніўня, Позірк. У Віцебску міліцыя са стральбой папярэдзіла спробу забойства непаўналетняй, паведамляе прэс-служба МУС.

Раніцай 20 жніўня “на лінію “102” патэлефанавала жанчына і паведаміла, што яе 17-гадовую дачку забівае знаёмы”: “Да месца здарэння неадкладна выбылі супрацоўнікі Першамайскага РАУС абласнога цэнтра. У двары дома яны ўбачылі мужчыну, які наносіў удары нажом дзяўчыне”.

Патрабаванні кінуць зброю фігурант праігнараваў, а затым паспрабаваў напасці на супрацоўнікаў міліцыі, гаворыцца ў рэлізе: “Ацаніўшы рэальную пагрозу жыццю і здароўю, адзін з міліцыянераў зрабіў прыцэльныя стрэлы па ніжніх канечнасцях зламысніка”.

Пацярпелую шпіталізавалі ў рэанімацыйнае аддзяленне. Затрыманага, 22-гадовага раней судзімага за наркаабарот мясцовага жыхара, таксама перадалі медыкам.

Распачата крымінальная справа за замах на забойства дзвюх і больш асоб.

“Паводле знешніх прыкмет у момант учынення злачынства фігурант знаходзіўся ў стане наркатычнага ап’янення. Для вызначэння яго фізічнага стану прызначаны адпаведныя экспертызы”, — гаворыцца ў рэлізе.

У ліпені супрацоўнікі міліцыі двойчы прымянялі зброю пры затрыманні нецвярозых мужчын.

Аб “ліквідацыі” падазраванага ў падвойным забойстве ў Рагачоўскім раёне (Гомельская вобласць) паведамляла МУС 27 сакавіка.

З пачатку года ведамства не менш як шэсць разоў паведамляла аб затрыманнях вадзіцеляў на дарогах з прымяненнем зброі, як правіла, у нецвярозым стане.