Вушы рэжыму Лукашэнкі тырчаць за кожным тэзісам Карпушонак — НАУ

1 верасня, Позірк. Публікацыя “чарговага паклёпу Вольгі Карпушонак” — гэта “мэтанакіраваная спецыяльная інфармацыйная аперацыя КДБ Беларусі, накіраваная на дыскрэдытацыю кіраўніка Народнага антыкрызіснага ўпраўлення (НАУ) Паўла Латушкі”. Пра гэта гаворыцца ў рэакцыі НАУ на чарговыя заявы ў адрас палітыка з боку дэлегата Каардынацыйнай рады Карпушонак.

“Можам выказаць здагадку, што дадзенае відэа запісана загадзя, бо яно не ўтрымлівае ніводнага факту, ніводнага доказу і не адказвае ні на адзін наш контраргумент, выкладзены ў публікацыі НАУ”, — адзначылі ў арганізацыі.

“Звяртаем увагу, што яна спасылаецца на ціск з боку незалежных СМІ і некаторых калегаў, але і ў гэтым выпадку не прыводзіць ніякіх фактаў і доказаў. Сцвярджэнне Вольгі Карпушонак “вы забывалі пра сваю бяспеку” сведчыць пра тое, што яе сапраўды варта было баяцца. Таму ёй і было прапанавана прайсці паліграф, пасля чаго яна спыніла сваё валанцёрства ў НАУ”, — гаворыцца ў заяве.

“Вушы рэжыму тырчаць за кожным тэзісам Вольгі Карпушонак”, — заявілі ў НАУ.

З новай заявай на адрас Латушкі Карпушонак выступіла на сваёй старонцы ў “Фэйсбуку” 1 верасня. Сярод іншага яна зноў абвінаваціла палітыка ў сексуальных дамаганнях і выказала гатоўнасць “пацвярджаць свае словы канкрэтнымі фактамі”.

Як паведамлялася, дэлегат Каардынацыйнай рады (спіс “Хопіць баяцца!”), экс-адвакат Вольга Карпушонак абвінаваціла кіраўніка НАУ Паўла Латушку ў сексуальных дамаганнях. Адпаведны пост яна апублікавала ў “Фэйсбуку” 30 жніўня.

Латушка назваў гэтыя абвінавачванні “хлуснёй і паклёпам”. Ён плануе звярнуцца ў праваахоўныя органы з заявай аб паклёпе, а таксама падрыхтаваць грамадзянскі пазоў да Карпушонак аб абароне гонару і годнасці і патрабаваць абвяржэння.