МЗС уручыла ноту паверанаму ў справах Польшчы ў сувязі са “шпіянажам” манаха Гавела

5 верасня, Позірк. Часовы павераны ў справах Польшчы ў Беларусі Кшыштаф Ажана быў выкліканы 5 верасня ў МЗС, паведаміла прэс-служба беларускага знешнепалітычнага ведамства.

Польскаму дыпламату, як адзначаецца, быў заяўлены “рашучы пратэст і ўручана адпаведная нота ў сувязі са здзяйсненнем грамадзянінам Рэспублікі Польшча Гжэгажам Гавелам на тэрыторыі Рэспублікі Беларусь акта шпіянажу”.

Таксама Ажане ўказана “на недапушчальнасць падобных дзеянняў Варшавы, якія груба парушаюць прынцыпы добрасуседства і наносяць сур’ёзны ўрон двухбаковым адносінам”.

Польскі бок апавешчаны аб намеры Мінска “даць прававую ацэнку інцыдэнту”, які адбыўся, заявілі ў МЗС.

“Беларускі бок запатрабаваў ад польскага боку ўстрымацца ад дзеянняў, якія наносяць урон нацыянальнай бяспецы Рэспублікі Беларусь, і вярнуцца ў рэчышча цывілізаванага дыялога і агульнапрынятых форм міждзяржаўнай камунікацыі”, — гаворыцца ў паведамленні.

Пра затрыманне ў Лепелі (Віцебская вобласць) грамадзяніна Польшчы, які нібыта збіраў сакрэтную інфармацыю для спецслужбаў сваёй краіны, паведамлялася ў сюжэце дзяржаўнага тэлеканала “Беларусь 1”, які выйшаў у эфір 4 верасня.

Сцвярджалася, што супрацоўнікі КДБ затрымалі Гжэгажа Гавела 1998 года нараджэння (пазней высветлілася, што ён манах-кармеліт), які пражывае ў Кракаве. Нібыта ён праз сацыяльныя сеткі ўсталяваў кантакт з грамадзянінам Беларусі і прапанаваў яму супрацоўніцтва ў інтарэсах польскіх спецслужбаў.

Заяўляецца, што супрацоўніцтва заключалася ў канспіратыўным зборы і перадачы закрытай інфармацыі, звестак пра камандны склад, а таксама пра супрацоўнікаў беларускай ваеннай контрвыведкі. Атрыманую інфармацыю Гавел нібыта перадаваў польскім сілавікам.

У прыватнасці, сакрэтныя звесткі пра ваенныя аб’екты Беларусі ён збіраў для Агенцтва ўнутранай бяспекі, а за перадачу патрэбных даных абяцаў не названаму ў рэпартажы беларусу штомесячнае грашовае ўзнагароджанне.

Адзначаецца, што супрацоўнікі беларускай контрвыведкі затрымалі замежніка, як толькі ён атрымаў сакрэтны дакумент: у рэпартажы была прадэманстраваная раздрукоўка на 8 старонак фармату А4 паводле тэмы беларуска-расійскіх вучэнняў “Захад-2025”.

У дачыненні да грамадзяніна Польшчы распачата крымінальная справа паводле арт. 358 КК (шпіянаж), вядзецца следства. “Усе падрабязнасці” справы дзяржпрапаганда абяцала распавесці “пазней”. У пачатку рэпартажу было адзначана, што затрыманыя грамадзяне Беларусі і Польшчы, аднак падрабязнасцяў пра магчымых беларускіх фігурантаў справы прыведзена не было. У сюжэце бачна затрыманне двух чалавек, адзін з якіх Гавел.

Арышт польскага грамадзяніна з’яўляецца “чарговай правакацыяй” рэжыму Аляксандра Лукашэнкі, накіраванай супраць Польшчы, заявіў прэс-сакратар міністра спецслужбаў Яцэк Дабжыньскі.

Прэм’ер-міністр Польшчы Дональд Туск заявіў, што Варшава падрыхтуе “меры ў адказ”, калі сітуацыя з затрыманнем польскага грамадзяніна не будзе вырашана ў бліжэйшы час.

Прэзідэнт Польшчы Караль Наўроцкі абмеркаваў затрыманне Гавела з прадстаўнікамі Ватыкана.