КДБ дадаў у “спіс тэрарыстаў” дзевяць чалавек, у тым ліку траіх палітвязняў

9 верасня, Позірк. Камітэт дзяржаўнай бяспекі дадаў у спіс “асоб, якія маюць дачыненне да тэрарыстычнай дзейнасці”, яшчэ дзевяць чалавек. У абноўленым дакуменце, датаваным 4 верасня, але апублікаваным у спецыяльным тэлеграм-канале КДБ 9 верасня, цяпер фігуруе 1.456 пазіцый.

У спіс унесены асуджаныя:

• паводле арт. 130 Крымінальнага кодэкса (распальванне расавай, нацыянальнай, рэлігійнай або іншай сацыяльнай варожасці або варажнечы) — Юрый Рубашэнка і Сяргей Тулінаў;
• паводле арт. 361 (заклікі да мер абмежавальнага характару (санкцый), іншых дзеянняў, скіраваных на прычыненне шкоды нацбяспецы) — Арцём Сямёнаў, а таксама палітвязні Ірына Шумейка і Віктар Мека;
• паводле арт. 130 і 361 — Алег Слабуха і палітвязень Андрэй Бесаў;
• паводле арт. 289 (акт тэрарызму) і 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў) — Віктар Яскіч і Яўген Грук.

Напярэдадні стала вядома, што 3 верасня ў калоніі № 15 Магілёва памёр 36-гадовы палітвязень грамадзянін Расіі Андрэй Паднябенны, прыгавораны ў 2021 годзе ў тым ліку паводле ч. 1 і ч. 2 арт. 289 КК.

Абвешчаным “тэрарыстамі” зняволеным сярод іншага забаронена атрымліваць грашовыя пераводы.