Ціханоўская: Чакаем на вызваленне усіх палітвязняў

11 верасня, Позірк. Дэмакратычныя сілы чакаюць вызвалення ўсіх палітвязняў, заявіла Святлана Ціханоўская 11 верасня, каментуючы інфармацыю пра выхад на волю 52 беларускіх і замежных грамадзян, асуджаных у Беларусі з палітычных матываў.

“Мы знаходзімся каля амерыканскай амбасады [у Вільнюсе], дзе чакаем на вызваленне, як мы ведаем, 38 беларускіх палітвязняў, — сказала палітык журналістам. — Мы вельмі радыя, што нашыя родныя, нашыя сябры будуць на свабодзе. Але, вядома, называючы рэчы сваімі імёнамі, гэта не свабода, гэта дэпартацыя ў іншую краіну. І мы павінны заўжды трансляваць, што кожны чалавек у такой сітуацыі мае права ў на выбар — заставацца ў краіне ці з’язджаць у больш бяспечную краіну”.

“Мы ведаем імёны ўсіх палітвязняў, мы не можам іх зараз агучыць, каб не даваць нейкіх надзей, бо ёсць нейкая пэўная сакрэтнасць у гэтым. Калі ёсць нейкія запыты, мы можам спраўджваць ці не спраўджваць гэтыя імёны, але ўвесь спіс мы выдаць не можам”, — дадала Ціханоўская.

Паводле інфармацыі палітыка на 16:50, “людзі яшчэ не выехалі за межы” [Беларусі]. “Але будзем тут іх чакаць, пакуль не прыедуць”, — сказала яна.

“Мы гатовыя прыняць гэту групу людзей, — запэўніла дэмлідар. — Учора ў мяне была сустрэча з усімі праваабаронцамі, якія займаюцца палітвязнямі. Мы глядзелі, які ў нас capacity (патэнцыял. — “Позірк”.), каб прыняць людзей. То бок гэтую групу мы прымем. Мы, вядома, чакаем на вызваленне ўсіх”.

“Мы дзякуем намаганням прэзідэнта [ЗША Дональда] Трампа і высілкам нашых еўрапейскіх партнёраў, каб людзі былі вызваленыя. Асобна я хачу адзначыць ролю Літвы ў гэтым вызваленні. Літва заўжды надае гэты гуманітарны калідор, каб людзі змаглі вельмі хутка атрымаць візы і выехаць у бяспечную краіну”, — падкрэсліла Ціханоўская.