Раненні сярэдняй цяжкасці ў Крыме атрымалі двое беларусаў — МЗС
22 верасня, Позірк. Міністэрства замежных спраў пацвердзіла інфармацыю пра тое, што напярэдадні ў Крыме пацярпелі грамадзяне Беларусі.
“Згодна з удакладненымі звесткамі, двое пацярпелых атрымалі раненні сярэдняй ступені цяжкасці, — цытуюць дзяржСМІ знешнепалітычнае ведамства. — Беларускія дыпламаты знаходзяцца ў пастаянным кантакце з праваахоўнымі органамі і медыцынскімі ўстановамі. Міністэрства замежных спраў Рэспублікі Беларусь трымае сітуацыю на асаблівым кантролі. Пры неабходнасці грамадзянам будзе аказаная ўсебаковая падтрымка“.
Пра тое, што грамадзяне Беларусі маюцца сярод 13 пацярпелых, якія паступілі ў Ялцінскі шматпрофільны медыцынскі цэнтр Федэральнага медыка-біялагічнага агенцтва РФ пасля атакі беспілотнікаў 21 верасня, раней паведаміла ў сваім тэлеграм-канале Яніна Паўленка — “кіраўнік адміністрацыі” горада, які знаходзіцца ў анексаваным Расіяй Крыме.
Расія анексавала ўкраінскія тэрыторыі — Аўтаномную Рэспубліку Крым і горад Севастопаль — у 2014 годзе. Праезд замежнікаў у Крым не праз яе тэрыторыю Украіна лічыць парушэннем заканадаўства.
