Перавозчыкі аднаўляюць продаж квіткоў на прамыя аўтобусныя рэйсы ў Польшчу
23 верасня, Позірк. Перавозчыкі аднаўляюць прамыя аўтобусныя рэйсы з Беларусі ў Польшчу пасля паведамлення пра адкрыццё мяжы, вынікае з сабранай “Позіркам” інфармацыі.
“Экалайнс” паведаміў, што рэйсы Мінск — Варшава будуць адноўленыя з 24 верасня. Першы рэйс адправіцца ў 20:00 (кошт квітка 471 рубель).
З 25 верасня аднаўляе рэйсы ў Варшаву перавозчык “Рыч бас”: рэйс з Мінска запланаваны на 5 раніцы, з 26 верасня аднаўляецца рэйс Варшава — Мінск (у 05:30). Продаж квіткоў на сайце “на найбліжэйшыя даты будзе адноўлены сёння, пасля 19:00, у касах Цэнтральнага вакзала і на сайтах-партнёрах — з 24 верасня”, паведаміла кампанія ў тэлеграме. На сайце перавозчыка на момант публікацыі захоўвалася аб’ява пра адмену рэйсаў у Польшчу да 30 верасня.
Ужо даступныя квіткі па маршруце Гродна — Варшава ад перавозчыка “Атлас”. На 25 верасня запланаваныя рэйсы адпраўленнем у 00:20, 01:00, 08:10, 13:00, 21.00 і 22.10, адкрыты продаж на зваротныя рэйсы (кошт 150 рублёў).
“Мінсктранс” паведаміў, што з 24 верасня з аўтавакзала “Цэнтральны” ў Мінску аднаўляецца рух па рэгулярным маршруце Мінск — Варшава. З гэтай даты рэйсы ў польскую сталіцу запланаваныя штодзень у 19:00 і 21:30. З 25 верасня запланаваныя таксама штодзённыя рэйсы адпраўленнем у 00:10, 06:30, 13:30. Зваротныя рэйсы з Варшавы ў Мінск перавозчык плануе ажыццяўляць штодзень з 25 верасня ў 21:00 і 23:00, а таксама з 26 верасня ў 07:00, 12:00, 16:30. Цэны — ад 140 рублёў.
Таксама з 26 верасня “Мінсктранс” аднаўляе рэйсы Мінск — Мюнхен па серадах і пятніцах у 12:00, зваротныя рэйсы па нядзелях і пятніцах аднаўляюцца з 28 верасня (13:00).
У ноч на пятніцу 12 верасня Варшава закрыла мяжу з Беларуссю, у тым ліку чыгуначныя пераходы. Рашэнне было звязана з запланаванымі беларуска-расійскімі стратэгічнымі вучэннямі “Захад-2025”, пра што паведаміў прэм’ер-міністр Польшчы Дональд Туск. Тады перавозчыкі адмянілі прамыя рэйсы ў Польшчу.
23 верасня Польшча паведаміла, што мяжа з Беларуссю будзе адкрытая апоўначы 25 верасня (1:00 па беларускім часе). Ідзе гаворка як пра чыгуначныя, так і пра аўтамабільныя пункты пропуску.
