Прадукты харчавання выключаныя з пераліку тавараў для адсочвання

27 верасня, Позірк. Харчовыя прадукты выключаныя з пераліку тавараў, звесткі аб абароце якіх падлягаюць адсочванню, вынікае з пастановы Савета міністраў ад 25 верасня 2025 года № 528.

Як паведамляе прэс-служба Міністэрства антыманапольнага рэгулявання і гандлю, пад скарачэнне таксама трапілі абутак і бытавая хімія.

Дакумент прадугледжвае перанос тэрміну ўвядзення адсочвання бытавой тэхнікі (машыны пральныя бытавыя, пыласосы, робаты-пыласосы бытавыя, прасы электрычныя, камбайны кухонныя бытавыя, машыны пасудамыечныя бытавыя, чайнікі электрычныя, мульціваркі электрычныя, печы мікрахвалевыя, пліты (варачныя панэлі) бытавыя электрычныя, дрылі электрычныя, фены для валасоў, тэлевізары) з 1 кастрычніка 2025-га на 1 сакавіка 2026-га.

Таксама сёлета з 1 кастрычніка да 1 траўня 2026-га перанесеныя тэрміны ўвядзення маркіроўкі сродкамі ідэнтыфікацыі безалкагольных напояў і сокаў. Захавана маркіроўка гэтых тавараў уніфікаванымі кантрольнымі знакамі ў перыяд да 30 красавіка 2026-га.

З пераліку тавараў, што падлягаюць маркіроўцы сродкамі ідэнтыфікацыі, выключаныя мабільныя тэлефоны і ноўтбукі, якія былі ў карыстанні.

Акрамя таго, 25 верасня прынята сумесная пастанова ўрада і Нацыянальнага банка № 529/24, якой прадугледжаныя некаторыя дадатковыя правы суб’ектам гаспадарання.

Гаворка ідзе пра маркіроўку тавараў, што рэалізуюцца на тэрыторыі сельскай мясцовасці і ў гандлёвых аб’ектах з гандлёвай плошчай менш за 200 квадратных метраў.

Да 1 сакавіка 2029 года суб’екты могуць не весці дыферэнцаваны ўлік; не перадаваць у сістэму кантролю касавага абсталявання інфармацыю аб рэалізацыі маркіраваных тавараў, а таксама прадаваць медработнікам у сельскай мясцовасці, дзе адсутнічаюць аптэкі, медвырабы і тавараў аптэчнага асартыменту без выкарыстання касавага абсталявання.