З 1 кастрычніка дазволена паляванне на рысь, уключаную ў Чырвоную кнігу
1 кастрычніка, Позірк. З 1 кастрычніка 2025 года па 31 студзеня 2026-га ў Беларусі дазволена паляванне на рысь.
На сайце Дзяржаўнай інспекцыі аховы жывёльнага і расліннага свету пры прэзідэнце Беларусі адзначаецца, што паляванне на гэтую жывёлу было пад забаронай каля 40 гадоў. Паляваць заканадаўча дазволілі з 2025 года — з прычыны росту колькасці рысі ў асобных рэгіёнах краіны. Паводле розных даных, папуляцыя рысі ў Беларусі — каля 1.700 асобін.
Інспекцыя заявіла, што рысь, як і мядзведзь, у Беларусі “мае бінарны прыродаахоўны статус” — “з’яўляецца адначасова паляўнічай жывёлай і дзікай жывёлай, аднесенай да відаў, уключаных у Чырвоную кнігу”.
Пры гэтым здабыча “дазваляецца на падставе Плана кіравання папуляцыяй рысі”, зацверджанага Міністэрствам прыродных рэсурсаў і аховы навакольнага асяроддзя. Цяпер паляванне на гэту жывёлу дапускаецца ў Віцебскай (15 раёнаў), Гомельскай (14), Мінскай (8) і Гродзенскай (2) абласцях.
Урад дазволіў паляванне на тэрыторыі Беларусі на мядзведзя і рысь пастановай ад 23 красавіка № 233.
Дазвол на здабычу рысі для грамадзян Беларусі і іншых дзяржаў — членаў Еўразійскага эканамічнага саюза каштуе 200 рублёў (мінімальны лімітавы кошт), для грамадзян з астатніх дзяржаў — 500 рублёў.
Ахоўны статус зубра, мядзведзя і рысі ў Чырвонай кнізе паніжаны пастановай Мінпрыроды № 10 ад 14 сакавіка 2025 года.
18 сакавіка 2024 года Аляксандр Лукашэнка падпісаў указ, які карэктуе правілы палявання і вядзення паляўнічай гаспадаркі.
Дакументам дазволена паляванне на мядзведзя і рысь у “асаблівым рэжыме”, які дазваляе “кантралявана рэгуляваць іх колькасць, на падставе планаў кіравання папуляцыямі, якія распрацоўваюцца Нацыянальнай акадэміяй навук Беларусі”.
19 кастрычніка 2022 года старшыня Беларускага таварыства паляўнічых і рыбаловаў, былы міністр унутраных спраў Ігар Шуневіч выказаў меркаванне, што “з пункту гледжання прыродаахоўнай дзейнасці Чырвоная кніга — рудыментарны інструмент”.
Чырвоная кніга Беларусі была заснавана ў 1979 годзе. Яе першае выданне выйшла ў 1981-м на беларускай мове і ўключала 80 відаў жывёл і 85 — раслін.
