Ад пачатку года з абароту вынята больш за 480 адзінак незарэгістраванай зброі, добраахвотна здадзена звыш 300 адзінак — МУС

3 кастрычніка, Позірк. Ад пачатку 2025 года з абароту вынята больш за 480 адзінак незарэгістраванай зброі і каля 53 тыс. розных боепрыпасаў, паведамляе прэс-служба Міністэрства ўнутраных спраў.

Паводле інфармацыі ведамства, добраахвотна здадзена больш за 300 адзінак зброі і каля 19 тыс. боепрыпасаў.

Адзначаецца, што 6–10 кастрычніка ў Беларусі пройдзе чарговы этап аперацыі “Арсенал”, скіраваны на “прадухіленне парушэнняў заканадаўства ў сферы абароту зброі”.

У рамках аперацыі міліцыянеры “правераць умовы захоўвання грамадзянамі зарэгістраваных пісталетаў, стрэльбаў, нагадаюць пра меры бяспекі пры абыходжанні з імі”.

“Асаблівую ўвагу нададуць выяўленню нелегальнай зброі, боепрыпасаў, выбухных прыстасаванняў і выбуховых рэчываў, растлумачэнню насельніцтву парадку іх добраахвотнай здачы. <…> Асобы, якія добраахвотна перадалі ў органы ўнутраных спраў зброю і боепрыпасы, што незаконна захоўваюцца, вызваляюцца ад крымінальнай і адміністрацыйнай адказнасці”, — гаворыцца ў паведамленні.