Амбасадар Белы па відэасувязі ўручыў копіі даверчых грамат кіраўніку МЗС Бахрэйна

5 кастрычніка, Позірк. Амбасадар Беларусі ў Аб’яднаных Арабскіх Эміратах і Бахрэйне (па сумяшчальніцтве) Ігар Белы 5 кастрычніка ўручыў копіі даверчых грамат бахрэйнскаму міністру замежных спраў Абдулатыфу бін Рашыду аль-Заяні, паведамляецца на сайце дыпмісіі ў ААЭ.

Адзначаецца, што цырымонія ўручэння прайшла “ў фармаце відэаканферэнцыі”.

“Кіраўнік знешнепалітычнага ведамства Бахрэйна цёпла павітаў амбасадара Беларусі і пажадаў яму поспехаў ва ўскладзенай на яго місіі. У ходзе гутаркі бакі адзначылі высокі ўзровень узаемаразумення паміж дзвюма краінамі, падкрэслілі наяўнасць значнага патэнцыялу для развіцця супрацоўніцтва ў гандлёва-эканамічнай, інвестыцыйнай і гуманітарнай сферах. Намецілі шляхі актывізацыі кантактаў паміж дзелавымі коламі Беларусі і Бахрэйна, а таксама пашырэння дагаворна-прававой базы двухбаковых адносін”, — гаворыцца ў паведамленні.

Белы і бін Рашыд аль-Заяні “пацвердзілі ўзаемную зацікаўленасць у паглыбленні палітычнага дыялогу і рэалізацыі канкрэтных сумесных праектаў, якія ўяўляюць узаемную цікавасць”, адзначае амбасада.

Дадатковы кірунак у Бахрэйн амбасадар у ААЭ Белы атрымаў ад Аляксандра Лукашэнкі 30 чэрвеня.

Беларусь зацікаўленая ў пашырэнні сувязяў з Бахрэйнам і “больш поўнай рэалізацыі ўсіх магчымасцяў супрацоўніцтва”, адзначыў Лукашэнка, віншуючы 16 снежня 2024 года караля гэтай краіны шэйха Хамада бен Ісу аль-Халіфу, наследнага прынца Сальмана бен Хамада аль-Халіфу, а таксама народ з Нацыянальным днём.

Дыпламатычныя адносіны паміж краінамі ўстаноўленыя 1 ліпеня 1996 года.

Міністэрства замежных спраў Беларусі раней паведамляла, што гандлёва-эканамічнае супрацоўніцтва паміж Беларуссю і Бахрэйнам “не носіць актыўнага характару”. Па выніках 2021 года беларускі экспарт тавараў склаў 300 тыс. долараў, аб бахрэйнскіх пастаўках не паведамлялася.