У Беларусі зніжаецца інфляцыйны ціск, сцвярджае ЕАБР

13 кастрычніка, Позірк. Інфляцыя ў Беларусі запавольваецца другі месяц запар, звярнулі ўвагу аналітыкі Еўразійскага банка развіцця (ЕАБР) у сваім штотыднёвым макрааглядзе.

“Рост цэн склаў 7,1% г/г (год да года. — “Позірк”.) у верасні 2025 года пасля 7,2% г/г у жніўні, — адзначылі эксперты. — Адзначаецца зніжэнне тэмпаў росту цэн на тавары: па харчовых — да 9,8% г/г у верасні пасля 9,9% г/г у жніўні, па нехарчовых — да 2,9% г/г пасля 3,2% г/г адпаведна. У той самы час інфляцыя ў сектары паслуг павялічылася да 7,9% г/г у верасні пасля 7,7% г/г у жніўні, што абумоўлена ростам рэгуляваных тарыфаў на ЖКП”.

“Упершыню адзначанае запаволенне ўстойлівага кампанента росту цэн: базавая інфляцыя знізілася да 7,5% г/г у верасні (7,7% г/г у жніўні), што сведчыць пра зніжэнне інфляцыйнага ціску”, — гаворыцца ў аглядзе.

Раней “Позірк” паведамляў, што спажывецкія цэны ў верасні 2025 года выраслі на 0,5%, за дзевяць месяцаў — на 5,8%, у гадавым вымярэнні — на 7,1%.

Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш як на 0,7% (па факце — +0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — на 3,3% (+5,4%), студзеня — ліпеня — на 3,4% (+5,6%), студзеня — жніўня — на 3,7% (+5,8%).

Далей: студзеня — кастрычніка — 4,1%, студзеня — лістапада — 4,4%, студзеня — снежня — 5% (гэтая адзнака з’яўляецца зацверджанай уладамі на 2025 год).

Тэндэнцыю расце інфляцыі “неабходна пераламаць”, заявіў Аляксандр Лукашэнка 9 верасня ў Мінску на нарадзе з апаратам Нацыянальнага банка і кіраўніцтвам банкаў.

На думку спікера, “роля Нацбанка ў гэтым працэсе наогул пакуль слаба прасочваецца”.