Моцны вецер чакаецца ў Беларусі 13 кастрычніка — МНС папярэджвае пра небяспеку

13 кастрычніка, Позірк. Паўночна-заходні вецер хуткасцю 5–10 метраў на секунду з парывамі да 14 м/с, месцамі — да 15–20 м/с, чакаецца ў Беларусі 13 кастрычніка, вынікае з інфармацыі Міністэрства па надзвычайных сітуацыях і Белгідрамета.

Шкала Бофарта класіфікуе вецер ад 4 да 10 м/с як слабы, умераны і свежы вецер у парадку ўзрастання хуткасці (у дыяпазоне 3–5 балаў з 12). 14 м/c адпавядае моцнаму ветру (7 балаў), да 20 м/c — вельмі моцнаму (8 балаў).

Чакаецца, што будзе пахмурна з праясненнямі. Удзень на большай частцы Беларусі прагназуюцца кароткачасовыя дажджы, аднак у асобных раёнах магчымы снег. Тэмпература паветра складзе ад 4 да 10 градусаў цяпла, на паўднёвым захадзе — да 12 градусаў.

МНС папярэджвае, што ўмовы надвор’я могуць прывесці да пашкоджання або абрыву ліній сувязі і электраперадачы, адключэння электрычных падстанцый, электраэнергіі ў населеных пунктах; пашкоджання або абвальвання слаба ўмацаваных канструкцый, дахаў будынкаў, збудаванняў; падзення дрэў.

12 кастрычніка праз непагадзь было парушанае электразабеспячэнне ў 37 населеных пунктах Віцебскай вобласці.