Лукашэнка стварае “абменны фонд” з палітвязняў — МЗС Украіны

15 кастрычніка, Позірк. Масавыя арышты і заключэнне беларускіх грамадзян па справе “Беларускага гаюна” з’яўляюцца безумоўным пацвярджэннем сістэмных парушэнняў правоў чалавека ў Беларусі, заявіла Міністэрства замежных спраў Украіны.

У рэлізе, апублікаваным напярэдадні, МЗС з прыкрасцю канстатуе, што “падставай для прылічэння да лагера “здраднікаў”, “свядомых” або, як любіць выказвацца Аляксандр Лукашэнка, “адмарозкаў” можа стаць што заўгодна, нават неасцярожна вымаўленае на беларускай мове слова”.

У заяве выказваецца ўпэўненасць, што затрыманні маюць на мэце стварыць “абменны фонд”, дзякуючы якому Лукашэнка разлічвае “купляць сабе індульгенцыі ў абмен на нявінных людзей”.

Кіеў заклікаў міжнародную супольнасць узмацніць ціск на Лукашэнку і “яго паслугачоў”.

Нагадаўшы, што з 2022 года Беларусь стала саўдзельнікам злачынства агрэсіі супраць Украіны, даўшы сваю тэрыторыю, паветраную прастору і рэсурсы для вядзення Расіяй вайны супраць Украіны, МЗС настойвае на адказнасці за гэта Мінска.

“Беларусь павінна абавязкова панесці сваю частку адказнасці за ўчыненне гэтага злачынства і ўсе вытворныя зверствы супраць украінскага народа. Верым, што ў будучыні дэмакратычная Беларусь пройдзе шлях ачышчэння ад злачынстваў лукашэнкаўскай дыктатуры, адновіць сваю незалежнасць і суверэнітэт пасля гадоў расійскага валадарства і вернецца ў сям’ю еўрапейскіх народаў, якой яна належыць гістарычна, палітычна і культурна“, — адзначыў МЗС.

Праваабарончы цэнтр “Вясна” мае інфармацыю “пра як мінімум 88 пацверджаных фігурантаў” палітычна матываванай справы “Беларускага Гаюна” (маніторынг ваеннай актыўнасці ў Беларусі, у тым ліку расійскай арміі), узятых пад варту.

“Агульная ж лічба затрыманых значна большая. Затрыманні адбываюцца да гэтага часу па ўсёй Беларусі, але большая частка — у Гомельскай вобласці”, — гаворыцца ў апублікаваным 13 кастрычніка паведамленні.

Большасць фігурантаў гэтай справы мужчыны. У віну ставіцца ў віну арт. 361⁴ КК (садзейнічанне экстрэмісцкай дзейнасці).

Паводле звестак рэгіянальнага медыяпраекта “Флагшток”, у Гомельскай вобласці па гэтай справе “было затрымана больш як 250 чалавек з пачатку 2025 года”: “У спісах на затрыманне могуць знаходзіцца ў цэлым больш як 1 тыс. чалавек. Сілавікі па чарзе адпрацоўваюць тых, хто трапіў у спіс”.

Праект “Беларускі Гаюн” быў створаны пасля поўнамаштабнага расійскага ўварвання ва Украіну ў 2022 годзе. Спыніў працу 7 лютага 2025 года, неўзабаве пасля таго, як невядомыя атрымалі доступ да чат-бота, дзе “збіралася інфармацыя ад людзей”.

Пра масавыя затрыманні па справе “Беларускага Гаюна” паведамлялася 2 траўня.

У чэрвені Гродзенскі абласны суд завочна прыгаварыў заснавальніка праекта Антона Матолькі да 20 гадоў пазбаўлення волі за “шэраг наўмысных злачынстваў экстрэмісцкай накіраванасці”.