Ціханоўская падзякавала ўсім, хто працуе над “вызваленнем невінаватых з турмаў Лукашэнкі”

15 кастрычніка, Позірк. Усім, хто працуе “над вызваленнем невінаватых з турмаў Лукашэнкі“, падзякавала дэмакратычны лідар Святлана Ціханоўская на сваёй старонцы ў сацсетцы Х.

Яна выказала ўдзячнасць намесніку міністра замежных спраў Польшчы Марцыну Басацкаму і намесніку спецпрадстаўніка прэзідэнта ЗША па Украіне Джону Коўлу.

“Кожнае вызваленне — гэта перамога гуманізму, — падкрэсліла палітык. — Мы глыбока цэнім намаганні прэзідэнта ЗША Дональда Трампа і яго каманды па выратаванні закладнікаў рэжыму“.

Паводле слоў Ціханоўскай, усе палітвязні павінны быць вызваленыя, а рэпрэсіі ў Беларусі неабходна спыніць.

Раней у гэты дзень Басацкі паведаміў, што Коўл “дамовіўся аб наступных траншах вызвалення палітычных зняволеных“ у Беларусі. Дамоўленасць, паводле слоў дыпламата, тычыцца вызвалення “з рук Лукашэнкі” супрацоўнікаў тэлеканала “Белсат” і польскіх грамадзян.

2 лютага 2025 года ў выніку непублічных перамоваў у Мінску намесніка памочніка дзяржсакратара ЗША Крыстафера Сміта і прадстаўнікоў беларускіх уладаў былі вызваленыя і адпраўленыя ў Літву палітвязні Андрэй Кузнечык (супрацоўнік “Радыё Свабода“), Алена Маўшук, а таксама асуджаны ў рамках палітычна матываванай справы амерыканскі і ўкраінскі грамадзянін Мікалай Шугаеў.

21 чэрвеня ў беларускай сталіцы адбыліся перамовы Лукашэнкі і спецыяльнага прадстаўніка Трампа па Украіне Кіта Келага. Неўзабаве пасля гэтага на волю адпусцілі і дэ-факта выслалі з краіны 14 чалавек, пераважна палітвязняў, у тым ліку відэаблогера Сяргея Ціханоўскага — мужа Святланы Ціханоўскай.

52 зняволеных, у тым ліку 40 палітычных, было вызвалена 11 верасня ў рамках здзелкі паміж адміністрацыяй Трампа і Лукашэнкі. Умовай вызвалення быў выезд вязняў з краіны.

Адзін з вызваленых — апазіцыйны палітык Мікалай Статкевіч — адмовіўся эміграваць у Літву, куды павезлі групу, і вярнуўся на беларускую тэрыторыю.

28 верасня стала вядома, што спецпасланнік прэзідэнта ЗША па Украіне Джон Коўл не выключае вызвалення ў найбліжэйшай будучыні праваабаронцы, палітвязня, нобелеўскага лаўрэата Алеся Бяляцкага.