Пагранкамітэт абвінаваціў Літву ў “штучным нагнятанні” сітуацыі з аэрастатамі

28 кастрычніка, Позірк. Органы памежнай службы “ў межах кампетэнцыі” прымаюць “усе магчымыя меры для выяўлення выпадкаў і затрымання метэазондаў, што выкарыстоўваюцца ў супрацьпраўнай дзейнасці”, заявіў на прэс-канферэнцыі ў Мінску 28 кастрычніка начальнік упраўлення папярэдняга расследавання і прававога забеспячэння аператыўнай дзейнасці Дзяржпагранкамітэта (ДПК) Мікалай Барэйка.

Каментуючы заявы Вільнюса пра масавыя залёты ў краіну з Беларусі метэазондаў з кантрабандай, прадстаўнік ДПК падкрэсліў, што “сітуацыя літоўскім бокам штучна нагнятаецца, асабліва ў пытаннях нежадання Рэспублікі Беларусь неяк канструктыўна ўзаемадзейнічаць”.

Барэйка заявіў, што “па ініцыятыве літоўскага боку быў спынены шэраг пагадненняў”, у тым ліку пагадненне паміж урадамі Беларусі і Літвы аб асноўных прынцыпах трансгранічнага супрацоўніцтва, пратакол аб абмене інфармацыяй паміж пагранслужбамі і іншыя.

“Таму, што датычыцца органаў пагранічнай службы, то свае абавязкі і задачы па аказанні садзейнічання ўзброеным сілам у ахове дзяржаўнай мяжы ў паветранай прасторы мы выконваем”, — сказаў чыноўнік.

Літва прыкладна з 22:10 26 кастрычніка закрыла на нявызначаны тэрмін абодва наземныя пункты пропуску на мяжы з Беларуссю — Мядзінінкай (з беларускага боку Каменны Лог) і Шальчынінкай (Беняконі). Гэта было зроблена ў адказ на масавыя залёты на тэрыторыю краіны з Беларусі аэрастатаў, меркавана з кантрабанднымі цыгарэтамі. Праз гэта чатыры разы спыняў працу аэрапорт у Вільнюсе, затрымліваліся і адмяняліся авіярэйсы, пацярпелі тысячы пасажыраў.

27 кастрычніка Літва выказала чарговы рашучы пратэст Беларусі ў сувязі з пастаяннымі парушэннямі паветранай прасторы гэтай балтыйскай дзяржавы.

Беларускае МЗС уручыла ноту часоваму паверанаму ў справах Літвы Эрыкасу Вілканецасу ў сувязі з “аднабаковым закрыццём Літвой мяжы без паведамлення”.

Раней прэзідэнт Літвы Гітанас Наўседа прапанаваў абмежаваць транзіт з Беларусі ў Калінінградскую вобласць (РФ) праз залёт у краіну аэрастатаў.